د 20ەمین سالڤەگەرا سەرھلدانا 12 ئادارێ دە خەلکێ قامشلۆ بەرێ خوە دان گۆرستانێن شەھیدێن سەرھلدانێ. سیاسەتمەدار و خەلکێ رۆژاڤا دبێژن، کورد یەکەم ملەت بوو کو ل سووریێ ل دژی دەستھلاتا دیکتاتۆر راوەستیان و سەرھلدانا 12 ئادارێ ژ بۆ شۆرەشا سووریێ بوو بنگەھ.
خەلکێ قامشلۆ ب ئالا کوردستانێ بەر ب گۆرستانێن کو شەھیدێن 12 ئادارێ لێ ھاتبوون ڤەشارتن مەشیان. سیاسەتمەدارێن کورد دبێژن سەرھلدانا 12 ئادارێ ل دژی زلما رەژیما بەعس بوو و رەژیما سووریەیێ نەکاریە کوردان بێدەنگ بکە.
سیاسەتمەدار حەسەن سالح دبێژە: “ئیرۆ سالڤەگەرا سەرھلدانا کوردستانا سووریەیێ یا 2004ێ یە کو تێ دە رێژیما سووریەیێ ھاتیە ھەژاندن. رێژیما سووریەیێ بەریا یاریا فۆتبۆلێ یا ل قامشلۆیێ دەست ب کوشتنێ کر، لێ ملەتێ کورد ل ھەمبەر وێ زولم و زۆرداریێ ل سەرانسەری کوردستانێ دەست ب بەرخوەدانێ کر. ئەم تەکەز دکن ژی کو ملەتێ کورد دێ بەردەوام بە د بەرخوەدانا خوە دە تا مافێن خوەیێن چارەنڤیسی بدەست بخە.”
زێدەتر ژ 30 خۆرتێن کورد ل باژارێن جودایێن رۆژاڤایێ کوردستانێ ب دەستێ ھێزێن ئەولەکاریا سووریەیێ ھاتن شەھیدکرن. ھەروھا رەژیمێ ب ھەزاران کورد گرتن. وەلاتیێن رۆژاڤایێ کوردستانێ دبێژن کو سەرھلدانا 12 ئادارێ بنگەھا شۆرەشا سووریەیێ بوو و کورد یەکەم نەتەوە بوو کو ل ھەمبەر رەژیمەکە دیکتاتۆر راوەستیان.
لێکۆلینەر و نڤیسکار شڤان ئبراھیم دبێژە: “کێمترین وەفاداری ژ شەھیدێن 12 ئادارێ رە، ڤەژینکرنا بیرانینا وانا سالانەیە، پێویستە ببە بریارەک کو دبستان، پارک و ھەر جھێ گشتی ب ناڤێ وان وەرن بناڤکرن. شۆرەشا 12 ئادارێ کۆشکا زۆرداریێ ھەژاند و د ھەمان دەمێ دە بوو بنگەھا شۆرەشا سووریەیێ ب تەمامی.”
د 12 ئادارا 2004 دە ل قامشلۆیێ د دەما یاریا فوتبۆلێ یا د ناڤبەرا تیما جیھاد یا قامشلۆ و تیما فتوێ یا دێرازۆرێ دە، جەماوەرێ تیما فتوێ سڤکایەتی ب ئالا و کەسایەتێن کوردستانێ کرن و ب دار و کێران ئێریشی ئەندامێن تیما جیھاد یا کورد کرن. ل شوونا کو ھێزێن ئەولەھیێ یێن سووریەیێ رەوشێ کۆنترۆل بکن، رەوش ئالۆزتر کرن و ب فەرمانا پارێزگارێ حەسەکێ یێ وێ دەمێ، ھێزێن ئەولەھیێ ھەژمارەک ژ جوانێن کورد شەھید و بریندار کرن.
