سەرۆکێ جڤاتا دادوەری یا هەرێما کوردستانێ دبێژە، «نابە ب چ بەهانەیان دەستکاری د مادەیێن دەستووری یێن هەرێما کوردستانێ دە بێ کرن». تەکەز ژی دکە، «دادگەها فەدەرالی زێدەگاڤی د دەستهلاتێن خوە یێن قانوونی دە کریە».
سەرۆکێ جڤاتا دادوەری یا هەرێما کوردستانێ دادوەر عەبدولجەبار عەزیز حەسەن ئیرۆ چارشەمێ، 13\3\2024 د دەرهەقا داوی بریارا دادگەها فەدەرالی یا ئیراقێ یا گرێدایی پرسا کوتایان دە راگەهاندنەک بەلاڤ کر.
سەرۆکێ جڤاتا دادوەری یا هەرێما کوردستانێ گۆتیە، «ب چ بەهانەیان نابە دەستکاری د مادەیێن دەستووری یێن هەرێما کوردستانێ دە بێ کرن، ژ بەر کو دەستوورینە و دڤێ تەڤ ئالی و دادگەها فەدەرالی ژی پێ رە ل سەر وان مادەیان پابەند بن و ب بەهانەیێن نەرەوا ئارێشەیان ژێ رە چێ نەکن و بنپێ نەکن».
د پارەکە دن یا وێ راگەهاندنێ دە هاتیە، «مافێ هەرێما کوردستانێ یە د چارچۆڤەیا دەولەتا ئیراقێ دە مافێن خوە یێن دەستووری ب کار بینە، لێ دادگەها فەدەرالی زێدەگاڤی د دەستهلاتێن خوەیێن قانوونی دە کو د دەستووری دە هاتنە کریە، ب ئاوایەکی وەسا کو ماف دایە خوە دەستتێوەردانێ د تەڤایا تشتێن مەزن و بچووکێن هەرێما کوردستانێ دە بکە، وەکی بریارا هەژمار 83 یا سالا 2024ێ کو بریارا هلوەشاندنا کوتایێن وێ د قانوونا راستڤه‌كری یا هەژمار 1 یا سالا 1992ێ یا هلبژارتنێن پەرلەمانا کوردستانێ دە دایە و 11 کورسیێن پەرلەمانێ هلوەشاندنە و هەژمارا وان ژ بۆ 100 کورسیان کێم کریە».
هەروەسا ئاماژە دایە، «د وێ بریارێ دە ب ئاوایەکی ئەشکەرە دیار دبە کو بەرۆڤاژی وی دەستوورییە یێ کو ل بەر سیبەرا وی کار دکە».
