دوھ 13/3/2024 ئۆتۆمۆبیلەکا کاروانێ ئۆتۆمۆبیلێن سەرۆک کۆمارێ ترکیێ رەجەب تەییب ئەردۆگان، د رێیا ناڤبەرا شرنەخ و مێردینا باکورێ کوردستانێ دە راستی بوویەرەکی ھاتووچوونێ ھات و د ئەنجامێ دە زێرەڤانەکی ئەردۆگان جانێ خوە ژ دەست دا. لێ گۆتەگۆت و ئانگاشت ئانگۆ ئیدیعا ھەنە کو ئەردۆگان ژ ھەولدانەکی تەرۆرکرنێ رزگار بوویە.
دوھ دەما سەرۆک کۆمارێ ترکیێ ژ بۆ بانگەشەیا ھەلبژارتنێن شارەداریان سەردانا شرنەخا باکورێ کوردستانێ کر و ژ وێ دەرێ ژی دەرباسی ھەزەخێ بوو ئەو بوویەر پێکھات.
ئەردۆگان پشتی ھەزەخێ بەر ب مێردینا باکورێ کوردستانێ برێکەت کو میتینگەکا مەزن پێکبینە، لێ ئۆتۆمۆبیلەک ژ کاروانێ ئۆتۆمۆبیلێن وی راستی بوویەرەکا ھاتووچوونێ ھات و ژ بەر وێ زێرەڤانەکی وی ژیانا خوە ژ دەست دا، 2 زێرەڤانێن دن ژی بریندار بوون.
ھەرچەند د بەشەک چاپەمەنی و تۆرێن جڤاکی دە وسا ھاتە بەلاڤ کرن کو ئەردۆگان راستی ئێریشەکا تەرۆریستی ھاتیە و زێرەڤانەکی وی ژیانا خوە ژ دەست دایە، لێ ھەموو چاپەمەنیا ترکیێ، ب تایبەت چاپەمەنیا سەر ب ئۆپۆزیسیۆنێ ژی ب چ ئاوایەکی بەحسا وێ ئیدیعایێ نەکریە، کو ئەردۆگان ژ ئێریشەکە تەرۆریستی رزگار ببە و ھەموویان بەحسا وێ یەکێ کرن کو ئۆتۆمۆبیلەک راستی بوویەرەکا ھاتووچوونێ ھاتیە و ژ بەر وێ پاراستڤانەکی ئەردۆگان جانێ خوە ژ دەست دایە.
