رۆژا 14 ئادارێ د دیرۆکا کوردستانێ دە، خوەدی جھەکی تایبەتە کو د رۆژەکە وەک ئیرۆ یا سالا 1903 دە، سەرۆکێ تەڤگەرا رزگاریخوازا گەلێ کوردستانێ گەنەرال مەلا مستەفا بارزانی ژدایک بوو.
ب ڤێ بۆنەیێ، خەلکێ کوردستانێ بێیی جوداھیا بیر و باوەریێن خوە، نەتەوە و ئۆلێن خوە، مەراسیمێن جوربجور لدار دخن، ژ بەر وێ ژی جڤاتا نشتمانی یا کوردستانێ ئەڤ رۆژ کریە، وەکە رۆژەکا بەتلانەیا فەرمی.
گەنەرال مەلا مستەفا بارزانی، رێبەرێ مەزنترین شۆرەش د دیرۆکا رزگارخوازیا گەلێ کوردستانێ دەیە، د درێژاھیا تەمەنێ خوە دە وی دەست ژ داخوازکرنا مافێن خەلکێ بەرنەدایە، ھەول ژ بۆ بدەستانینا داخوازێن وی یێن نەتەوەیی دایە و رێبازەکا تژی داخوازیێن نەتەوەیی و نشتیمانی ل پەی خوە ھشتیە و بوویە سەرکردە و نموونەیەکا بلندا راستگۆیی و داخواز و مافێن نەتەوەیی.
مەلا مستەفا بارزانی، د قۆناغەکا دیرۆکی و چارەنڤیسدار دە، تێکۆشینا ل دژی داگیرکەرێن ھێزدار و ب پشتەڤان ھلبژارت کو گەلێ کورد د سەردەمەکا تژی ئێش و ئازار دە دژیا کو ژ بلی خوەدێ و رەوایەتیا دۆزا و ئامادەھیا زارۆکێن گەلێ کورد ژ بۆ ئازادیێ، ت پشتەڤانی و پەنایەکا دن ژێ رە نەبوو. لێ بەلێ ب ڤینەکا بھێز، ب خوەباوەری، رەوابوونا دۆزا خوە و ب وێرەکی شەر ژ بۆ ملەتێ خوە کر و میراتەیەکا مەزن یا تێکۆشینێ ل دژی زلم و زۆرداریێ ژ بۆ گەلێ کورد ھشت.
