پرانیا بریارێن دادگەها فەدەرال ل دژی قەواریا هەرێما کوردستانێ بوون

دادگەها بلندا فەدەرالا ئیراقێ، د کێمتری حەفت سالان دە؛ ل دژی هەرێما کوردستانێ و پێکهاتەیێن دن یێن ئیراقێ چەندین بریار دەرخستنە.

د سالا 2005ان دە، دەما کو ئیراق د هەیاما «دەستهلاتا ڤەگوهێز» دە بوو، دادگەها بلندا فەدەرالی ب بریارەکە وەزاری هات ئاڤاکرن، بەری کو دەستوورا نوو یا ئیراقێ بێ ئامادەکرن.

ل گۆر مادەیا 92 یا دەستوورێ، دادگەهـ هێژ نەکەتیە چارچۆڤەیا دەستووری یا دەولەتا فەدەرال، لێ بریارێن وێ ل دژی قەوارەیا فەدەرالی یا هەرێما کوردستانێ، نەتەوە و پێکهاتەیێن دن یێن ئیراقا فەدەرال بەردەوامن و ب ئاوایەکی ئاشکەرە دەستوورێ بنپێ دکە.

بریارێن دادگەها بلندا فەدەرالا ئیراقێ ل دژی هەرێما کوردستانێ و نەتەوە و پێکهاتەیان:

– د 20/11/2017ان دە، رەفەراندوما هەرێما کوردستانێ ب نەدەستووری راگهاند و هلوەشاند.

– د 15/2/2022ان ده‌، یاسایا نەفت و گازێ ب نەدەستووری و نەدادپەروەرانە بناڤ کر.

– رۆژا 4/10/2022ان، کۆمیسیۆنا بلندا هلبژارتن و راپرسیان یا هەرێما کوردستانێ ب نەدەستووری راگهاند.

– رۆژا 25/1/2023ان، شاندنا پەرەیان بۆ هەرێما کوردستانێ ب بەروڤاژی یاسا و مادەیێن دەستوورێ بناڤ کر.

– د 30/5/2023ان دە، درێژکرنا دەما پارلەمەنتۆیا کوردستانێ بۆ سالا پێنجەم هلوەشاند.

– د 28/8/2023ان، سزایا رێگرتنا ل دژی ڤەکرنا بارەگەهێن پارتیێن سیاسی راکر.

– د 3/9/2023ان دە، رادەستکرنا بارەگەهێن ئۆپەراسیۆنێن هەڤبەش ل کەرکووکێ ژ بۆ په‌ده‌كێ راوەستاند.

– د 14/11/2023 دە، دوورخستنا محەمەد حەلبووسی ژ سەرۆکاتیا پارلامەنتۆیا ئیراقێ.

– د 21/2/2024ان دە، دژایەتیا دادگەها فەدەرال ل دژی هەرێما کوردستانێ و پێکهاتەیان گهیشتە لووتکەیێ کو بریارا هلوەشاندنا 11 کورسیێن پارلامەنتۆیا هەرێما کوردستانێ دا و هەژمارا کورسیێن پارلامەنتۆیا کوردستانێ داخست 100 کورسی.

ژ بلی وێ ژی، بریار دا کو کۆمیسیۆنا هلبژارتنان یا ئیراقێ ل شوونا کۆمیسیۆنا بلندا هلبژارتن و راپرسیێ یا هەرێما کوردستانێ، لدارخستنا گەرا شەشەم یا هلبژارتنێن پارلامەنتۆیا کوردستانێ برێڤە ببە، هەرێما کوردستانێ ل سەر چار دەڤەران دابەش کر.