بەری 6 سالان، د 20/1/2018 دە ئارتێشا ترکیەیێ و کۆمێن چەکدارێن سەر ب وێ ڤە دەست ب ئێریشا ل سەر عەفرینێ کرن و پشتی شەرێ 58 رۆژان عەفرین و گوندەوارێ وێ داگیر کرن. د ئەنجاما داگیرکرنا عەفرینێ دە، زێدەتر ژ ھەزار وەلاتیێن کوردێن عەفرینێ شەھید و بریندار بوون، دۆرا 350 ھەزار وەلاتی ژی ب نەچاری دەربدەر بوون. پشتی 6 سالان ژ داگیرکرنێ ژی، ھینا بنپێکرنێن مرۆڤی، دزی و تالان، برین و دزینا داران، دەستدانین سەر مال و ملکێن خەلک و گوھارتنا دەمۆگرافیا عەفرینێ بەردەوامە.
رۆژا 20/1/2018 ئارتێشا ترکیەیێ ب تۆپ و مووشەکان عەفرین و گوند و ناڤچەیێن وێ، راجۆ، شیێ، بلبلێ، شەرا، جندرێسێ، مابەتا و شێرەوا تۆپباران و بۆمبەباران کرن و کۆمێن چەکدارێن ئۆپۆزیسیۆنا سووریەیێ ب فەرمانا ئارتێشا ترکیەیێ دەست ب ئێریشا بەژاھی ل سەر عەفرینێ کرن.
د ئێریشێ دە، مالێن سڤیلان، دبستان، ئاڤاھیێن فەرمی، نەخوەشخانە، مزگەفت، جھێن دیرۆکی و پیرۆز و ژێرخانەیا عەفرینێ ھاتن بۆمەبارانکرن و وێرانکرن.
ژ بەر ئێریشێ و ل گۆر ئامارێن ھاتنە راگھاند، زێدەتر ژ 300 وەلاتیێن عەفرینێ یێن سڤیل شەھید بوون و زێدەتر ژ 700 سڤیلان ژی بریندار بوون. ھەروھا دۆرا 350 ھەزار عەفرینی ژی ب نەچاری کۆچبەر و دەربدەر بوون، هەژمارەکا مەزن ژ وان ل گوندێن د ناڤبەرا عەفرین و حەلەبێ دە ھاتن بجھکرن و هەژمارەک دن ژی بەرێ خوە دا ھەرێمێن دن یێن کوردی و ھەرێما کوردستانێ.
پشتی شەرێ 58 رۆژان، ئارتێشا ترکیەیێ و کۆمێن چەکدارێن سەر ب وێ ڤە د رۆژا 18/3/2018 دە دەرباسی باژارێ عەفرینێ و گوندەوارێ وێ بوون و داگیر کرن و دەست ب دزی و تالانا مال، ئاڤاھیێن فەرمی، دکان و سامانێن وەلاتیێن سڤیل کرن.
ژ رۆژا 18 ئادارێ ڤە، وەلاتیێن عەفرینێ د مەترسی و د بن گەفان دە دژین. ب مەرەما ستاندنا پەرەیان ژ مالباتێن عەفرینی، ب ھەزاران خۆرت و کەچێن کورد ژ ئالیێ کۆمێن چەکدار ڤە ھاتن رەڤاندن و نھا ژی تێن رەڤاندن و راستی ئەشکەنجەیان تێن. ل گۆر ئامارێن چالاکڤانان، زێدەتر ژ 8500 وەلاتیێن عەفرینێ د ڤێ ھەیاما بووری دە ھاتنە رەڤاندن و تا نھا چارەنڤیسا زێدەتر ژ 2 ھەزار وەلاتیان نە دیارە.
ھەروھا ب ھەزاران عەرەبێن خووتایا شامێ، پارێزگەھا ئدلبێ و ناڤچەیێن جودایێن سووریەیێ ل عەفرینێ د مال و ملکێن کوردان دە تێن بجھکرن و دەمۆگرافیا عەفرینێ تێ گوھەرتن. ب سەدان ھەزار دارێن زەیتوونان ھاتنە دەستەسەرکرن و ب ھەزاران دارێن زەیتوون و میوەیێن دن ژی ھاتنە بڕین.
ژ دەما داگیرکرنا عەفرینێ ژ ئالیێ ئارتێشا ترکیەیێ و کۆمێن چەکداران ڤە، پرانیا جھێن شوونواری یێن عەفرینێ ل سەر دەستێ ئارتێشا ترکیەیێ ب ئاموورێن کۆلاندنێ یێن مەزن ھاتنە کۆلاندن و وێرانکرن. ل گۆر چالاکڤانێن د وارێ شوونواران دە، ئەنتیکە و شوونواران ژ گرێ جندرێسێ، کەلەھا نەبی ھۆری، کەلەھا سەمانێ و شکەفتا دودەری ھاتنە دزین و ژ ئالیێ کۆمێن چەکداران و بازرگانان ژ بۆ دەرڤەیی عەفرینێ ھاتنە دەرخستن.
رێخستنا مافێن مرۆڤان ل عەفرینێ بەلاڤ کریە، ئارتێشا ترکیەیێ و کۆمێن چەکدار زێدەتر ژ 50 جھێن شوونواری، گرێن دیرۆکی و مەزارگەھێن ئۆلی کۆلانە و زێدەتر ژ 20 ھەزار پەرچەیێن ئەنتیکان دزینە و ڤەگوھاستنە ترکیەیێ.
ل عەفرینێ گەلەک جھێن دیرۆکی ھەنە، ژ بلی کەلەھا ھۆری، کەلەھا سامانێ، شکەفتا دودەری، کەنیسەیا مارمارۆن و ب دەھان شوونوارێن دن، نێزیکی 25 گرێن دیرۆکی ھەنە، پرانیا وان د بەر چەمێ عەفرینێ رە رێزکری نە، کو دیرۆکا وان ڤەدگەرە ھەزار ھەتا 2 ھەزار سالان بەری زایینێ، پرانیا وان گران ب ئالاڤێن کۆلاندنێ ھاتنە کۆلاندن و تێکدان و کۆمێن چەکدار پارەک ژ وان گران ژی کرنە ناڤەندێن سەربازی.
