نوونەرێن خریستیانان ژ کلدان، ئاشووری، سوریان و ئەرمەنان پشتگریێ ل بریارا پارتیا دەمۆکراتا کوردستانێ (په‌ده‌ك) یا بایۆکتکرنا هلبژارتنێن پارلامەتۆیا کوردستانێ دکن.
نوونەرێن خریستیانان ژ کلدان، ئاشووری، سوریان و ئەرمەنانیێن هەڤپەیمانیا حەمۆرابی، هەڤپەیمانیا یەکیتیا نشتمانی و دەستەیا سیاسی یا بلندا کەلدانی داخویانیەکە هەڤپار دان و تێ دە گۆتن: «بریارا خرستیان و ترکمەنان و پشترە ژی بریارا یەکالیکەرا پارتیا دەمۆکراتا کوردستانێ (په‌ده‌كێ) وەک یەکەم و مەزنترین هێزا جەماوەری و سیاسی ل کوردستانێ، گاڤەکە چارەنڤیسازە ژ بۆ پاراستنا قەوارەیا دەستووری یا هەرێما کوردستانێ و پاراستنا پرەنسیپێن دەمۆکراسی، دەستوور، جوداکرنا دەستهلاتان و سرووشتا فەدەرالی یا ئراقێ یە».
د داخویانیێ دە هات گۆت: «ئەم سپاسیا رێزدار سەرۆک مەسعوود بارزانی دکن کو جارەکە دن ئیسبات کر کو د هەموو قۆناغێن دژوار و دیارکەر دە، یەکەم و بهێزترین پارێزڤانێ راستەقینەیێ بهایێن دەمۆکراسی، پێکەڤژیان، قەوارەیا فەدەرال و دەستووری یا کوردستان و ئراقێیە».
هەروها نوونەرێن خریستیانێن کلدانی، ئاشووری، سوریانی و ئەرمەنی تەکەزی ل سەر لدارخستنا هلبژارتنێن دادمەند ل هەرێما کوردستانێ دکن ل سەر بنگەهێ رێزگرتنا ژ سازیێن یاسایی، دەستووری و دادوەرییێن هەرێما کوردستانێ و ل گۆر یاسایەکە کوردستانی و برێکخستنا کۆمیسیۆنەکە کوردستانی یا بێئالی و بێیی دەستێوەردانا دەرڤە، کو هلبژارتنەکە کوردستانی بە و ژ بۆ هەموو کوردستانیا بە،نە ب یاسایەکە فەرزکری یا دەرڤە بە.
د داخویانیێ دە هات گۆتن: «ئەم پشتگری ددن داخویانیا په‌ده‌كێ و هەموو پێنگاڤێن کو ژ بۆ پاراستنا دەمۆکراسی، بێئالیبوونا سازیێن یاسایی و دەستوورا ئیراقا فەدەرال تێن ئاڤێتن. ئەمێ ل دژی هەر بریارەکێ بن کو سیستەما فەدەرالی و دەمۆکراتیکا ئیراقێ تێک ببە، ژ بەر کو ئەو ئیرۆ وەک راستیەک و دەستوور هاتیە ئاڤاکرن و بەرهەما خوینا پیرۆزا ب سەدهەزاران شەهیدێن سەربلندێن ڤی وەلاتییە».
ئالیێن ل سەر داخویانیێ ئیمزە کرن:
– ئەنجوومەنا نشتمانی یا کلدانی
– تەڤگەرا هەڤگرتن سوریانی
– کۆمیتەیا ئیداری یا مەزهەبی یا ئەرمەنان
– تەڤگەرا شلاما ژ بۆ کارووبارێن خرستیانان «کلدانی، سوریانی، ئاسووری و ئەرمەنی»
– پارتیا یەکیتیا دەمۆکراتیکا کلدانی
– هەڤبەندیا جیهانی یا کلدانی
– کۆمەلەیا ئەرمەنان
– هەڤپەیمانیا هامۆرابی – ئراق
– هەڤپەیمانیا یەکیتیا نەتەوەیی – هەرێما کوردستانێ
– دەستەیا بلندا سیاسی یا کلدانی
