ل سەر بریارا سەرۆک بارزانی و سەرۆکوەزیرێ هەرێما کوردستانێ، د زووترین دەم دە زیاندیتیێن لەهیا دهۆکێ تێن قەرەبووکرن.
پارێزگارێ دهۆکێ د. عەلی تەتەر ئیرۆ 20ێ ئادارێ پەیامەک ل تۆرا جڤاکی «فه‌یسبووكێ» بەلاڤ کر و تێ دە راگهاند، سەرۆک بارزانی و سەرۆکوەزیر مەسروور بارزانی بریار دانە د زووترین دەم دە قوربانیێن لەهیا دهۆکێ بێنە قەرەبووکرن.
پارێزگارێ دهۆکێ دا زانین ژی، هەموو هێزێن پێشمەرگە ژ بۆ ئالیکاریا زیانپێکەتیێن لەهیێ کەتنه رەوشا ئامادەهیێ و چ پێویست بە ژ بۆ وان، دێ بێ کرن.
ژ دوهی دانێ سبێ ڤە پێلەکە بارانا بهێز ب سەر هەرێما کوردستانێ گرتیە. باندۆرا زێدە ل سەر پارێزگەها دهۆکێ بوو کو ژ بەر بارانێ ل چەند تاخێن باژێر لەهی رابوو، ئاڤ دەرباسی هەژمارەک مالان بوو و هن رێ هاتن گرتن.
رێڤەبەریا بەرەڤانیا شارستانی یا دهۆکێ ژی راگهاند، د ئەنجاما لەهیێ دە، 3 کەسان ل پارێزگەها دهۆکێ جانێ خوە ژ دەست دانە.
دا زانین ژی، 10 خانی هلوەشیانە، 328 وەلاتی ژ ئالیێ تیمێن بەرەڤانیا سڤیل ڤە هاتنە رزگارکرن. هەروها نێزیکی 500 وەلاتیێن دن ژی ژ بۆ جهێ ئەولەهـ هاتن ڤەگوهاستن.
هەروها گۆت، 25 رێ زیان دیتنە، 15 دەزگەهێن گشتی زیان دیتنە و ئاڤ کەتیە نێزیکی 435 مالان، ژ وان 35 مال ل ناڤچەیا سێمێلێ نە. 200 وەسایتان و زێدە 40 دکان و مارکەت زیان دیتنە.
