رەڤاندڤا زارۆکان و لەشکەرکرنا وان ژ ئالیێ چەتەیێن ب ناڤێ “جوانێن شۆرەشگەر” ڤە کو راستەراست فەرمانا ژ قەندیلێ وەردگرن ل تەڤایا دەڤەرێن د بن کۆنترۆلا هەسەدێ دە بەردەوامە، ھەری داوی ژی زارۆکەکە 15 سالی ل باژارێ کۆبانێ یێ رۆژئاڤایێ کوردستانێ رەڤاند.
ل گۆر ئاگهیان، چەتەیێن پەکەکێ یێن ب ناڤێ “تەڤگەرا جوانێن شۆرەشگەر” زارۆکا ب ناڤە ڤیانا ئەحمەد ئبراھیم یا تەمەن 15 سالی، رۆژا 15 ئادارا 2024 ژ باژارێ کۆبانێ یێ رۆژئاڤایێ کوردستانێ رەڤاندن و بۆ لەشکەرگەھێن خوە برن، کو تا نھا چارەنڤیسا وێ نە دیارە.
گرووپا “جوانێن شۆرەشگەر” گرووپەکا چەتەیێن رۆژئاڤایێ کوردستانێ یە کو پرانیا وان گەنجێن ژ قۆتابخانەیێ ڤەقەتیایی نە و بێ کارن و راستە راست ب فەرمانا پەکەکێ کار دکەن. ئەڤ چەتە بەردەوام زارۆکێن تەمەنێ وان د بن 18 سالیێ دە ل رۆژئاڤا و دەڤەرێن د بن دەستهلاتا هەسەدێ دە درەڤینن و ب نەچاری وان چەکدار دکن.
تێ زانین، فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
