پارتیا وەلاتپارێزێن کوردستانێ (PWK) ھەلوەستا خوەیا ژ بۆ ھلبژارتنێن شارەداریان یێن 31 ئادارێ راگھاند. د داخویانیا نڤیسکی یا PWK دە شەرت و مەرجێن کو د کاندیدێن شارەداریان دە تێن خوەستن ھاتن دیارکرن و ھات راگھاندن کو ئەو دێ دەنگێن خوە بدن کاندیدێن وەلاتپەروەر و دەمۆکرات یێن کو بکاربن ماف و ئازادیێن گەلێ کورد بپارێزن و ھەگەر کاندیدێن ب ڤی رەنگی تونەبن ژی ئەو دەنگێن خوە ب کار نائینن.
د داخویانیا نڤیسکی یا پارتیا وەلاتپارێزێن کوردستانێ (PWK) دە ھات دیارکرن کو مەجلسا وان ژ بۆ ھلبژارتنێن ھەرێمی یێن 31 ئادارا 2024 بانگ ل پارتیێن سیاسی، دەزگەھێن سڤیل و پیشەیی و کەسایەتێن قەبوولبار کر و پێشنیاز کر و گۆت: “ب بەشداریا پۆتانسیەلا ھەری بەرفرەھا جڤاتا کوردستانێ، ل سەر داخوازێن لەزگین یێن گەلێ کورد و ب هەلوەستا کو ئەم مۆدەلا ناڤەندی، نەتەوەیی، دەمۆکراتیک یا رێڤەبەریێن ھەرێمی ب ھەڤ رە ئاڤا بکن، وەرن ئەم پلاتفۆرمێن ھلبژارتنێن ھەرێمی ئاڤا بکن و وەرن ئەم کاندیدێن خوە ب ھەڤ رە تەسبیت بکن، ئەم باژارێن خوە ب ھەڤ رە ئیدارە بکن.” لێ تەڤی کو بەشەکا دۆرفرەھا جڤاتێ و گەلەک دەزگەھێن سڤیل و کەسایەتێن قەبوولبار ب ئاوایەکی ئەرێنی پێشەوازیا ڤێ پێشنیازا مە کر ژی پارتیێن سیاسی خوە نەدان بەر ڤێ پێشنیازا مە و پلاتفۆرمێن ھلبژاتنانێن ھەرێمی نەھاتن ئاڤاکرن. ھەلبەت ئەڤ ئەنجام نایێ وێ واتەیێ کو سیاسەت و پێشنیازا مە خەلەت بوو. بیا مە، خەلەتی د وێ یەکێ دە بوو کو پارتیێن سیاسی ل گۆری ھشمەندیەکا ھەڤبەش تەڤنەگەریان، ب سیاسەتەکا خەلەت و ب ھشمەندیەکا ئەزئەزیتیێ تەڤگەریان و د ئەنجامێ دە خوە نەدان بەر ئاڤاکرنا پلاتفۆرمێن ھلبژارتنانێن ھەرێمی یێن ھەڤبەش.”
د بەردەوامیا داخویانیێ دە شەرت و مەرجێن کو ئەو دێ وەکی PWK دەنگێن خوە بدن کیژان کاندیدان ژی ھاتن ئەشکەرەکرن و ب بەردەوامی وھا ھات گۆتن:
“پشتی کو پلاتفۆرمێن ھلبژارتنان یێن ھەرێمی یێن ھەڤبەش نەھاتن ئاڤاکرن، د رەوشا ئیرۆ یا ھەیی دە PWK دێ د ھلبژارتنێن ھەرێمی یێن 31 ئادارا 2024 دە ل گۆری ڤێ پەرسپەکتیفا سیاسی و مۆدەلا رێڤەبەریێن ھەرێمی کو مە ل ژۆر پێناسە کریە، دەنگێن خوە بدن نامزەدێن وەلاتپەروەر، دەمۆکرات یێن کو ژ بۆ کوردستانێ ستاتویەکا سیاسی، گەلی، جوگرافی و داخوازێن لەزگین یێن گەلێ کورد د بانگەشەیێن خوەیێن ھلبژارتنێ دە ب جھ بکن و بپارێزن. ل جھێن کو کاندیدێن ب ڤان سالوخەتان تونەبن، ئەم دەنگێ خوە نادن چ کەسی.”
