تەڤی کو مەها ئادارێ بەر ب داویێ ڤە دچە ژی، ل گەلەک باژارێن باکورێ کوردستانێ ژ بەر بارینا بەرفێ هشیاری ل وەلاتیان هات کرن. سازیا کەش و هەوایێ یا ترکیەیێ راگهاند کو، تێ تەخمینکرن ل سەرانسەرێ هەرێمێ بارینا بەرف و بارانێ بەردەوام بکە و ل باژارێن کو ژ بەر بلنداهیێ بەرفێ دگرن ژی هشیاریا ئاشووتێ هات کرن.
ل گۆری داخویانیا سازیا کەش و هەوایێ یا ترکیەیێ، ل سەرانسەرێ باژارێن باکورێ کوردستانێ و ب تایبەتی ل باژارێن وەکی مووش، بەدلیس، جۆلەمێرگ، وان، شرنەخ و سێرتێ؛ بارینا بەرفەکە ب باندۆر تێ تەخمینکرن و ل باکور-رۆژهلاتێ دیاربەکرێ، ل باکورێ شرنەخێ و ل دەردۆرا چەولیگێ ژی بارینا باران و بەرفێ تێ تەخمینکرن.
هەر وها هات دیارکرن کو ل مێردین و دەردۆرێن وێ، ل باشوورێ ئێلهێ و ل باکورێ شرنەخ و سێرتێ ژی بارانەکە گوژ تێ پایین و ژ بەر ڤێ ژی هشیاری ل وەلاتیان هات کرن کو ل هەمبەر لەهی، ئاشووت، جەمەد و بای هشیار بن دا کو د چوون و هاتنێ دە پرسگرێکێن نەیینی دەرنەکەڤن.
هەر وها پارێزگاریا بەدلیسێ ژی ب داخویانیەکێ راگهاند کو ژ بەر بارینا بەرفێ یا ژ شەڤا بۆری ڤە بریار هاتیە دایین کو ل ناڤەندا باژێر و ل ناڤچەیا تەتوانێ دبستانێن فەرمی و یێن تایبەت رۆژەکێ بێن گرتن.
