د 24 ده‌مژمێران دا 8 کۆلبەر ل رۆژهلاتێ کوردستانێ هاتنە بریندارکرن

دەرەنگیا شەڤێدی ل زۆزانێن سنۆرێ ناڤبەرا باشوور و رۆژهلاتێن کوردستانێ ل نێزی کۆمەلگەها هەلشۆیێ یا سنۆرێ پشدەرێ مینەک ب هەژمارەکە کۆلبەرێن رۆژهلاتێ کوردستانێ ڤە تەقی و دو کۆلبەر بریندار بوون.

هات راگهاندن ئەو تەقین ل سنۆرێ رۆژهلاتێ کوردستانێ بوو و ئەو هەر دو کۆلبەرێن بریندار ژی ژ ئالیێ هێزێن ئیرانێ ڤە ژ بۆ نەخوەشخانەیێن باژارێ سەردەشتێ هاتنە ڤەگوهاستن.

ژ ئالیەکی دن ڤە مالپەرا کۆلبەر نیۆز بەلاڤ کریە، «د دو روودانێن جودا دە، هێزێن ئیرانێ ل سنۆرێ نەوسوودا رۆژهلاتێ کوردستانێ راستەراست تەقە ل هەژمارەکە کۆلبەران کریە و شەش کۆلبەر بریندار کرنە».

وێ چاڤکانیێ ئاماژە ژی دایە، «ئەو کۆلبەر خەلکێ گوندێن سەریاس، دالاهۆ، سەلاسیا باوەجانی و باژارێ جوانرۆیێنە و برینێن دو ژ وان گرانن و رەوشا وان خرابە».

مالپەرا کۆلبەر نیۆز د راپۆرتەکێ دە نڤیسیە، د هەیاما ناڤبەرا نەورۆزا پار هەتا نەورۆزا ئیسال دە ل سنۆرێن پارێزگەهێن ئورمیە، سنە و کرمانشانێ 44 کۆلبەر هاتنە کوشتن و 400 کۆلبەر ژی هاتنە بریندارکرن، کو هەژمارا وان ل بەرانبەری سالا 2022ێ 90% زێدە بوویە. هەروەسا 37 ژ وان کوشتی و برینداران زارۆکێن د بن ژیێ 18 سالیێ دەنە.

چاڤكانی: كوردستان 24