گرۆپێن چەکدارێن ئۆپۆزیسیۆنا سووریەیێ یێن لگەل ئارتێشا ترکیەیێ ھەرێما عەفرینێ داگیر کرنە، 4 وەلاتیێن کورد ژ عەفرینێ رەڤاندن.
رێخستنا مافێن مرۆڤان ل عەفرینێ بەلاڤ کر، گرۆپا چەکداران یا ب ناڤێ “پۆلیسێن لەشکەری” رۆژا 26 ئادارێ وەلاتیێ ب ناڤێ مستەفا ئیبراھیم یێ ژ ناحیا مابەتا رەڤاند، کو بەری رۆژەکێ ژ ھەرێما شەھبایێ ڤەگەریابوو عەفرینێ.
دیار کر ژی، رۆژا 25 ئادارێ شێخ محەمەد ئیسماعیل ژ مالا خوە یا ل تاخا ئەشرەفیێ یا عەفرینێ ھات رەڤاندن و ھەتا نھا چارەنڤیسا وی نە دیارە.
ھەروھا رۆژا 17 ئادارێ ژی وەلاتیێ ب ناڤێ فارووق محەمەد شێخۆ ل ناحیا مابەتا ژ ئالیێ پۆلیسێن سڤیل ڤە ھات رەڤاندن و ھەتا نھا چارەنڤیسا وی نە دیارە.
رێخستنا مافێن مرۆڤان ل عەفرینێ راگھاند ژی، وەلاتیێ ب ناڤێ محەمەد ئەسلان ژ رۆژا 11 ئادارێ ڤە ژ ئالیێ پۆلیسێن لەشکەری ڤە ھاتیە رەڤاندن و ھەتا نھا چارەنڤیسا وی ژی نە دیارە.
شەش سال د سەر داگیرکرنا ھەرێما عەفرینێ ژ ئالیێ ئارتێشا ترکیێ و گرۆپێن چەکدارێن سەر ب وێ ڤە دەرباس دبن و ھەتا نھا زێدەتر ژ 9 ھەزار کەس ھاتنە رەڤاندن کو چارەنڤیسا ھەژمارەکا مەزن ژ وان نایێ زانین.
ل گۆر چالاکڤانێن عەفرینێ، گرۆپێن چەکداران ب ئارمانجا کو کوردێن عەفرینێ نەچار ببن دەست ژ جھ و وارێ خوە بەردن و کۆچبەر ببن، وەلاتیان درەڤینن و ئەشکەنجە ددن، پەرە، فدیە و باجان ژ وان دستینن.
