سەرۆکێ گشتی یێ پارتیا ئینسان و ئازادیێ (PÎA) دبێژە، سەرۆک بارزانی ژ بۆ گەلێ کورد کەسایەتیەکی گەلەک گرینگە و تەنێ ئەو دکارە د ڤەژاندنا پرۆسەیا ئاشتیێ د ناڤبەرا ترکیێ و پەکەکێ دە رۆلەکێ بلیزە.
سەرۆکێ گشتی یێ پارتیا ئینسان و ئازادیێ (PÎA) ئەحمەد کایا د گەرا نووچەیان یا K24 دە دەربارێ ئەگەرا دەستپێکرنا پێڤاژۆیەکە نوو یا چارەسەریێ دە راگھاند، “کورد پێشتر ب ھەستیاری نێزیکی پێڤاژۆیا چارەسەریێ بووبوون، لێ ژ نھا و پێ ڤە دڤێت کورد ب ستراتەژی، پلان و بەرنامە نێزیکی وێ ببن. ژ بەر شەرت و مەرجێن کوردان یێن نھا، نە وەک یا 2012 و 2023 و دڤێت ژ ئالیێ کوردان ڤە کەسێن کو گۆتنێن وان ب قیمەت و روومەتن رۆلا خوە ببینن.”
ھەروھا گۆت ژی: “سەرۆک بارزانی ژ بۆ گەلێ کورد کەسایەتەک پر گرینگە. دەما کو دئاخڤە، پارتیێن دن ژی گۆتنێن وی جدی دگرن. لەوما دکارە ب تێکلیێن خوەیێن سیاسی د ڤەژاندنا پێڤاژۆیا چارەسەریێ دە رۆلا خوە بلیزە.”
ئەڤ د دەمەکێ دەیە، زێدەتری 8 سالان ب سەر تێکچوونا پرۆسەیا ئاشتیێ د ناڤبەرا حکوومەتا ترکیێ و پەکەکێ دەرباس بوون. د سالا 2015 دە پشتی گەلەک ئالۆزیێن ئەولەھیێ یێن ل باکورێ کوردستانێ ئەڤ پێڤاژۆ تێک چوو.
ل گۆر ئامارێن نەفەرمی، ژ دەما تێکچوونا پرۆسەیا ئاشتیێ د ناڤبەرا ترکیێ و پەکەکێ دە؛ 614 سڤیل، 1428 ئەندامێن ھێزێن ئەولەھیێ، 4409 گەریلایێن پەکەکێ و 226 کەسێن کو ناسنامەیا وان نەھاتە زانین، جانێ خوە ژ دەست دانە.
جەمیل بایک د 9 شباتێ دە ژ بەر ئەردھەژا ل ترکیێ و باکورێ کوردستانێ چالاکیێن لەشکەری یێن پەکەکێ راوەستاندبوو. د 1 ئادارێ دە داخوازا ژ نوو ڤە دەستپێکرنا پرۆسەیا ئاشتیێ کر و داخواز ژ ئامەریکا کر کو د ناڤبەرا وان و ترکیێ دە رۆلەکێ بلیزە، لێ ھەولێن وی بێ ئەنجام مان.
