٧٧ سال ب سەر بدارڤەکرنا پێشەوا قازی محەمەد، سەرۆکێ کۆمارا کوردستانێ ل مەھابادێ دەرباس دبن. د 31 ئادارا 1947 دە پێشەوا و ھەڤالێن وی ژ بەر راگھاندنا کۆمارا کوردستانێ ل مەیدانا مەھابادێ ھاتن دارڤەکرن.
د 31 ئادارا 1947 دە، نووچەیەکێ تەڤاھیا کوردستانێ ھەژاند، پێشەوا قازی محەمەد کو کێمی سالەکێ، بوو سەرۆکێ کۆمارا کوردستانێ ل مەھابادێ، تەڤی برایێ خوە ئەبوولقاسم سەدر قازی و پسمامێ خوە حەمە حوسێن خان سەیفی قازی، ھاتن بدارڤەکر.
قازی محەمەد رۆژا 22 چلەیا 1946 دە ل مەیدانا چارچرایێ یا مەھابادێ کۆمارا کۆمارا کوردستانێ راگھاند. د 17 بەرچلەیا 1946 دە پشتی تێکچوونا کۆمارێ، د 31 ئادارا 1947 دە قازی محەمەد، وەزیرێ بەرەڤانیێ یێ کۆمارێ سەیفی قازی و برایێ وی ئەبوولقاسم سەدر قازی ل مەیدانا چارچرایێ یا مەھابادێ ھاتن بدارڤەکرن.
قازی محەمەد و ھەڤالێن خوە، ژ بەر راگھاندنا کۆمارا کوردستانێ ھاتن بدارڤەکرن، حکوومەتا پاشایەتی ژی ب تۆمەتا پەرچەکرنا ئیرانێ ئەو تۆمەتبارکرن.
قازی محەمەد دامەزرێنەرێ پارتیا دەمۆراتا کوردستانێ بوو، ب دامەزراندنا پارتیێ رە ژی، د 22 چلەیا 1946 کۆمارا کوردستانێ ژی راگھاند. کۆمارا کوردستانێ پشتی 11 مەھان کەتە بەر پلانەکا ناڤخوەیی و ھەرێمی. پشتی یەکیتیا سۆڤیەت ل سەر کێلگەھێن پەترۆلێ یێن باکورێ ئیرانێ لگەل رێژیما پاشەیەتی رێکەفت، ھێزەکا بەژایی و ئەسمانی ئێریشی کوردستانێ کر.
ھەر چ ھەگەر سەرۆکوەزیرێ وێ دەمێ یێ ئیرانێ ئەحمەد قەوام سەلتەنە سۆز دا پێشەوا کو ئازارا کەسی نەدە و دێ بەشێن دن یێن کوردستانێ بکە یەک و ئیدارەیەکا کوردی رابگھینە، لێ ب پشتەڤانیا تەماما بریتانیا و بێدەنگیا سۆڤیەتێ، ھێز ب سەر ناڤچەیێ دە بر و رێژیما ئیرانێ ب پشتەڤانیا سۆڤیەت، بریتانیا و ئامەریکا ل ناڤچەیێ، کۆمارا کوردستانێ ھلوەشاند و پێشەوا ژی ب دار ڤە کر.
بەشەکا مەزن ژ دیرۆکنڤیس و لێکۆلینەرێن ناڤنەتەوی دبینن کو ئالا، پێشمەرگە و پارلەمان سێ کۆچکەیێن نەگوھێر یێن کۆمارا کوردستانێ بوونە و رادەستکرنا ئالا کوردستانێ ژ ئالیێ قازی محەمەد بۆ مەلا مستەفا بارزانی یێ نەمر وەک دەستەکی ئەمین و نشتمانپەروەر، بەردەوامیا وێ رێیێ یە، کو ئیرۆ نە سبە ھەر ئەو ئارمانج پێک تێ.
