گرۆپێن چەکدارێن ئۆپۆزیسیۆنا سوورییێ یێن لگەل ئارتێشا ترکییێ ھەرێما عەفرینێ داگیر کرین، 3 وەلاتیێن کورد رەڤاندن.
رێخستنا مافێن مرۆڤان ل عەفرینێ بەلاڤ کر، گرۆپا چەکداران یا ب ناڤێ “پۆلیسێن مەدەنی” رۆژا 25 ئادارێ کالەمێرێ 70 سالی یێ ب ناڤێ عەبدولعەزیز ئەحمەد ئیبراھیم ژ باژارۆکێ جندرێسێ رەڤاند، کو بەری چەند رۆژان ژ ھەرێما شەھبایێ ڤەگەریابوو عەفرینێ.
دیار کر ژی، رۆژا 23 ئادارێ ژێ کالەمێرێ 64 سالیێ ب ناڤێ محەمەد حوسێن ل گوندێ گەمرووکێ یێ سەر ب ناڤچەیا مابەتا ڤە ھات رەڤاندن و ھەتا نھا چارەنڤیسا وی نە دیارە.
رێخستنا مافێن مرۆڤان ئاماژە ب وێ ژی کر، وەلاتیێ ب ناڤێ محەمەد ئیسماعیل محەمەد یێ 40 سالی رۆژا 29 ئادارێ ژ ئالیێ گرۆپەکا چەکداران ڤە ھات رەڤاندن و پشتی دانا 7 ھەزار دۆلاران ھات بەردان.
شەش سال د سەر داگیرکرنا ھەرێما عەفرینێ ژ ئالیێ ئارتێشا ترکیێ و گرۆپێن چەکدارێن سەر ب وێ ڤە دەرباس دبن و ھەتا نھا زێدەتر ژ 9 ھەزار کەس ھاتنە رەڤاندن کو چارەنڤیسا ھەژمارەکا مەزن ژ وان نایێ زانین.
ل گۆر چالاکڤانێن عەفرینێ، گرۆپێن چەکداران ب ئارمانجا کو کوردێن عەفرینێ نەچار ببن دەست ژ جھ و وارێ خوە بەردن و کۆچبەر ببن، وەلاتیان درەڤینن و ئەشکەنجە ددن، پارە، فدیە و باجان ژ وان دستینن.
