ئیسرایلێ دەردۆرا شامێ مووشەکباران کر

 ئیسرایلێ ئێریشی سەر چەند جھێن ل دەردۆرا شامێ کر و ل گۆری مەدیایا سووریێ ژی، د ئەنجاما ئێریشێ دە 2 کەس بریندار بوونە.

ئاژانسا فەرمی یا سووریێ “سانا” ل سەر زارێ ژێدەرەکی لەشکەری بەلاڤ کر، ئارتێشا ئیسرایلێ شەڤا بۆری دەمژمێر 21:30، ژ ئالیێ جۆلانێ ڤە ب مووشەکان ئێریشی چەند خالێن ل دەردۆرا شامێ کر.

ل گۆری وێ ژێدەری، د ئەنجاما ئێریشێ دە 2 کەس بریندار بوونە و ھندەک زیانێن مادی دەرکەتنە.

ژ ئالیەکی دن ڤە، رەوانگەھا سووری یا مافێن مرۆڤان بەلاڤ کر، 4 مووشەکێن ئیسرایلێ ل “ناڤەندا لێکۆلینێن زانستی” یا ل ھەرێما جەمرایا یا ل دەردۆرا شامێ کەتن و د ئەنجامێ دە ئاگر ب جھێ ئێریشێ کەت.

ل گۆری زانیاریان ژ دەستپێکا ئیسال ڤە، ئیسرایلێ 29 جاران خاکا سووریێ کریە ئارمانج و 58 خال و کۆمگەھێن چەکان و بارەگەھێن لەشکەری وێران کرنە.

ھەروھا د ئەنجاما وان ئێریشان دە، 115 لەشکەرێن سووری و چەکدارێن میلیشیایێن سەر ب پاسدارێن ئیرانێ ڤە ھاتنە کوشتن و 47 کەس ژی بریندار بوونە.