پارێزگارێ وانێ بریار دا کو ژ ئیرۆ ھەتا 15 رۆژان ھەمی خوەنیشاندان و کۆمبوون و چالاکیێن دن ل وێ پارێزگەھێ قەدەغە نە.
پشتی رەدکرنا سەرکەفتنا کاندیدێ دەم پارتیێ عەبدوللا زەیدان د ھلبژارتنێن سەرۆکاتیا شارەداریا وانێ دە و دانانا کاندیدێ ئاک پارتیێ عەبدولھەت ئارڤاس ل جھێ وی، گەلەک نەرازیبوون پەیدا بوون.
ژ بۆ کو رێ ل خوەنیشاندانێن جەماوەری بێ گرتن، پارێزگارێ وانێ بریار دا کو ژ بۆ ھەیاما 15 رۆژان تەڤایا چالاکیان بێن قەدەغەکرن. بریارە ژ 3 ھەتا 17 ڤێ مەھێ قەدەغە بەردەوام بە و رێ ل دەرکەفتن و چوونا ناڤ سووکا باژارێ وانێ ژی تێ گرتن.
ئەڤ د دەمەکێ دەیە کو ھەڤسەرۆکێن دەم پارتیێ شەڤێدی گەھشتنە وانێ و بریارە ئیرۆ جڤینا ئاسایی یا پارتیا خوە ل وی باژاری بکن. ھەروەسا بریارە ھەر ئیرۆ سیاسەتمەدارا کورد و پەرلەمانتەرا بەرێ یا ترکییێ لەیلا زانا و شاندەکا پەرلەمانتەرێن جەهەپێ جودا جودا ژ بۆ پشتەڤانیا کاندیدێ سەرکەفتی یێ دەم پارتیێ عەبدوللا زەیدان بچن وانێ.
ھەر ب وێ مەرەمێ پارێزگەرێ بەدلیسێ ژی عەینی بریارێ دەرخستیە و تەڤ چالاکی قەدەخە کرنە لێ ئەو بریار ل بەدلیسێ دژوارترە، قەدەغەیا گشتی ھاتیە راگەھاندن و چ وەلاتیەک نکارە ژ مالا خوە ژی دەربکەڤە.
د داخویانیا پارێزگەھیا بەدلیسێ دە وھا ھاتیە، “پشتی ھلبژارتنێن شارەداریان، ل گەلەک دەڤەران ئالۆزی دەرکەتنە و ژ بەر وێ سەدەمێ ژی، د ناڤ سینۆرێن جوگرافی یێن پارێزگەھا بەدلیسێ دە، تەڤ ئاوایێن چالاکیان ژ رۆژا 3/4/2024 ھەتا رۆژا 17/4/2024، ژ بۆ ھەیاما 15 رۆژان ھاتنە قەدەغەکرن”.
وەزیرێ ناڤخوەیێ ترکییێ عەلی یەرلیکایا ژی ژ ئالیێ خوە ڤە راگەھاندیە، 89 کەس ل ناڤ خوەنیشاندانان ھاتنە گرتن و ب تێکدان و شێواندنا ئەولەھیا ترکییێ ھاتنە تۆمەتبارکرن.
ھەروەسا وەلاتیان ل باژارێن باتمان، گەڤەر، جۆلەمێرگ، شرنەخ، مێردین، سێرت، فارقین، ئزمیر، مانیسا و ستەنبۆلێ ژی ل دژی دوورخستنا کاندیدێ سەرکەفتی یێ دەم پارتیێ عەبدوللا زەیدان خوەنیشاندان کرن.
ل دوو ئەنجامێن دەستپێکێ یێن ھلبژارتنێن شارەداریێن ترکییێ و باکورێ کوردستانێ، عەبدوللا زەیدان ب رێژەیا 55%یا دەنگان سەرکەفتیێ یەکێیێ بازنێ پارێزگەھا وانێ بوو.
رۆژا یەکشەمێ، 31 ئادارا 2024، ھلبژارتنێن شارەداریان ل باکورێ کوردستانێ و ترکییێ ھاتن کرن، کو 34 پارتیێن سیاسی ھەڤرکی ل سەر سەرۆکاتیا 81 شارەداریان کر.
د وێ پرۆسەیا ھلبژارتنان دە، زێدەتری 61 ملیۆن کەسان مافێ دەنگدانێ ھەبوو. ل دوو راگەھاندنا کۆمسیۆنا بلندا ھلبژارتنان یا ترکییێ، 100% دەنگ ھاتنە ڤاڤارتن، لێ تشتێ کو ھاتیە راگەھاندنا ھەتا نھا تەنێ ئەنجامێن دەستپێکێ نە و بریارە پشتی یەکالیکرنا سکالایان، ئەنجامێن داویێ بێن راگەھاندنا.
