رێخستنا ب ناڤێ “جوانێن شۆرەشگەر” یا گرێدایی پارتیا کارکەرێن کوردستانێ (پەکەکێ) زارۆکەکا بچووک ژ باژارێ منبجێ کو د بن کۆنترۆلا ھێزێن سووریەیا دەمۆکراتیک دەیە رەڤاند.
ل گۆر ئاگاهیان، رێخستنا “جوانێن شۆرەشگەر” د دەستپێکا مەھا نیسانا 2024 دە کەچا تەمەن بچووک ب ناڤێ میرنا عەبدل-وەیسی ئەل-وەیسی ژ باژارێ منبجێ ب ئارمانجا لەشکەرکرنا وێ رەڤاند.
زارۆکا بچووک یا ب ناڤێ “میرنا” 16 سالی یە و ل باژارێ منبجێ دژی، ئەو د 25 چلەیا 2008 دە ژ داییک بوویە، ناڤێ دایکا وێ عەیشێ یە.
فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
