ئیرۆ 36 سال ل سەر هێرشا ئەنفالا کوردستانێ را دەرباس دبن کو تێدا رژێما بەعس یا رووخاندی ب ھەزاران ژن و زارۆکێن گەرمیانێ ڤەگوھاستن و به‌رزه کرن.
بەری 36 سالان رژێما بەعس یا ئیراقێ ل پێش جڤاکا ناڤدەولەتی د ھەیاما 7 مەھان دا و د چارچۆڤەیا 8 قۆناغان دا، پرۆسەیا ئەنفالکرنا گەلێ باشوورێ کوردستانێ برێڤەبر، د وێ پرۆسەیا لەشکەری یا رژێما بەعس دا، زێدەتر ژ 4 ھەزار و 500 گوندێن کوردستانێ و ب سەدان باژارۆک و زۆزان وێران کرن و خەلکێ وێ بەر ب چارەنڤیسەکا نەدیار ڤە برن.
د هێرشا ئەنفالێ دا له‌شكه‌رێ ئیراقێ ب ھەموو جورە چەکێن نوو و تەکنۆلۆژییا نوو ژ ئاسمان و زەمینێ ڤە، هێرش کر و ب ھەزاران مالباتێن کوردان ئەنفال کرن.
ئەنفال یان جینۆساید و قرکرنا کوردان یەک ژ تاوانێن رژێما بەعسا رووخاندی بوو، کو د 8 قۆناغان دا دەرباس بوو.
قۆناغا یەکەم: ژ 22 شوباتێ و تا 18 ئادارا 1988ێ بەردەوام کر و د ڤێ قۆناغێ دا گەلیێ جافایەتی ھات ئەنفالکرن.
قۆناغا دویەم: ژ 22 ئادارێ و تا 1 نیسانا 1988ێ برێڤە چوو، ناڤچەیا قەرەداخ ھات ئەنفالکرن.
قۆناغا سێیەم: ژ 7 نیسانێ و تا 20 نیسانا 1988ێ ل ناڤچەیا گەرمیان ھات ئەنجام دان.
قۆناغا چارەم: ژ 3 گولانێ و تا 15ی گولانا 1988ێ ل ناڤچەیا قەلاسێوکێ و گەلیێ زێیێ بچووک ھات ئەنجامدان.
قۆناغا پێنجەم، شەش و ھەفتەم: ژ 15 گولانێ و تا 26 ئیلۆنا 1988ێ برێڤە چوو و تێدا ناڤچەیێن شەقلاوا و رەواندزێ بەر پێلا ئەنفالێ کەتن.
قۆناغا ھەشتەم: ژ 26 تەباخێ و تا 6 ئیلۆنا 1988ێ برێڤە چوو و تێدا هێرش ل سەر دەڤەرا بادینانێ ھاتە کرن.
د کۆما ھەشت قۆناغێن پرۆسەیا ئەنفالێ دا، رژێما بەعس یا ژناڤچوویی 182 ھەزار کورد ل باژار و گوندێن کوردستانێ ئەنفال کرن.
