سەرۆک بارزانی د 36 سالیا ئەنفالێ دە پەیامەک بەلاڤ کر و تێ دە راگھاند: ھەر چەندە ئەنجامدەرێن ئەنفال و تاوانێن دن تێک چوونە و کەتنە زبلدانا دیرۆکێ دە، لێ شۆپا جینۆساید و زولما ل دژی گەلێ مە ھەر مانە و برینێن گەلێ مە دەرمان نەبوونە.
سەرۆک مەسعوود بارزانی د پەیاما خوە دە گۆت: “حەملەیا ئەنفالێ یەک ژ مەزنترین تاوانێن رەژیما بەرێ یا ئیراقێ یە، کو ب ئارمانجا ژناڤبرن، وێرانکرن و قرکرنا گەلێ کورد ھاتیە کرن. د وێ کۆمکوژی و جینۆسایدێ دە کو د چەند قۆناغان دە و ب ئاوایەکی رێکخستنی ل ھەموو پارچەیێن کوردستانێ ھاتبوو کرن، 180 ھەزار وەلاتیێن کوردستانێ یێن بێگونەھ ھاتن ونداکرن و شەھیدکرن. لگەل وێ ژی کیمیابارانکرنا کوردستانێ، وێرانکرنا ب ھەزاران گوند، پلانێن عەرەبکرنێ، کۆچبەرکرنا ب دارێ زۆرێ و وێرانکرنا ژێرخانا ئابۆری، دەمۆگرافیک، جڤاکی و دەروونی یا کوردستانێ، بەشەکێ دن یێ وان تاوانان بوو کو ب ئاوایەکێ رێکخستی ژ ئالیێ رەژیما ئیراقێ ڤە ل دژی گەلێ مە ھاتن کرن.”
سەرۆک بارزانی ھەروھا گۆت: “ھەر چەندە ئەنجامدەرێن ئەنفال و تاوانێن دن تێک چوونە و کەتنە زبلدانەکا دیرۆکێ، لێ شۆپا جینۆساید و زولما کو ل سەر گەلێ مە ھاتیە کرن، مایە و برینێن گەلێ مە نەھاتنە دەرمانکرن. تەڤی وێ زلم و زۆرداریا مەزن یا کو ل سەر گەلێ مە ھاتیە کرن، لێ مخابن ھین ژی د دەولەتا ئیراقێ دە دەنگ و رەنگێن شۆفینیست ل دژی کوردان دەردکەڤن. ئەرکێ سازیێن فەرمی یێن دەولەتا ئراقێ یە کو کار ژ بۆ قەرەبووکرنا ئەنفال و جینۆساید و زولما ل سەر گەلێ کوردستانێ ھاتیە کرن بکن و دڤێت رێ ل ھەر جورە ھەول و سیاسەتێن خەراب بگرن کو ب ھزرەکا شۆفینیست و ئینکاریێ ل مافێن گەلێ کوردستانێ دنێرن.
سەرۆک بارزانی دبێژە: “د 36ەمین سالڤەگەرا تاوانا ئەنفالێ دە، پێزانینا مە بۆ قوربانیدان و خوەراگریا مالباتێن ئەنفالکریان و شەھیدان ھەیە و سلاڤ ل گیانێ شەھیدێن ئەنفالێ و ھەموو شەھیدێن تەڤگەرا ئازادیا کوردستانێ.”
