پارتیا وەلاتپارێزێن کوردستانێ (PWK)ێ ب بۆنەیا سالڤەگەرا شەهیدکرنا رێبەرێن کورد خالد بەگێ جبری و یوسف زیا بەگ و هەڤالێن وان پەیامەکی نڤیسکی یا ببیرانینێ بەلاڤ کر.
داخویانیا PWKێ وهایە:
د دیرۆکا کوردستانێ دە ژ سەرهلدان و تەڤگەرێن نەتەوەیی یێن هەری گرینگ یەک ژێ ژی تەڤگەرا نەتەوەیی یا 1925انە کو وەکە سەرهلدانا شێخ سەعید تێ ناسکرن. وەکە تێ زانین، ئامادەکارییا ڤێ سەرهلدانێ ژ ئالیێ تەشکیلاتا ئازادییێ (کۆمیتەیا ئیستیقلالێ یا کوردستانێ) ڤە هاتبوو دەستپێکرن.
تەشکیلاتا ئازادییێ د سالا 1921ێ دە هاتییە دامەزراندن. سەرۆکێ وێ ژی خالد بەگێ جبری بوو. یەک ژ رێڤەبرێ تەشکیلاتا ئازادییێ ژی یووسف زیا بەگ بوو.
لێ مخابن بەرییا کو ئامادەکارییا سەرهلدانێ تەمام ببە، دەولەتا تركیێ ژ بۆ رێ ل بەر ڤێ سەرهلدانێ بگرە، د جۆتمەها 1924ان دە پێشی یووسف زیا بەگ گرت، پاشێ ژی د 20ێ چلەیا پێشینا 1924ان دە خالد بەگێ جبری گرت. دەولەتا تركیێ هەردو رێبەرێن کوردان شاندن زیندانا بەدلیسێ.
پشتی گرتنا خالد بەگێ جبری و یووسف زیا بەگ، ب پرۆڤاکاسیۆنەکە دەولەتا تركیێ، سەرهلدان بەری دەما کو هاتبوو پلان کرن دەست پێ کر. رێبەرێ نەتەوەیی، ئۆلی و جڤاکی یێ گەلێ کوردستانێ شێخ سەعید سەرۆکاتییا ڤێ سەرهلدانێ کر.
ل گۆری بریارا دیوانا حەربێ یا بەدلیسێ کو دیوانەکە حەربێ یا کو ب دەستهلاتێن تایبەتی یێن دەولەتا تركیێ ڤە هاتبوو وه‌زیفەدار کرن، د رۆژا 14ێ نیسانا 1925ان دە، ل بەدلیسێ خالد بەگێ جبری و یووسف زیا بەگ هاتن کوشتن. هەتا نها ژی نایێ زانین كانێ هەردو رێبەرێن مللەتێ کورد ب گوللـەبارانکرنێ یان ژی ب دارڤەکرنێ هاتنە قەتلکرن.
هەردو رێبەرێن گەلێ کوردستانێ، ژ بەر دامەزراندنا تەشکیلاتا ئازادییێ و ئامادەکارییێن سەرهلدانەکە نەتەوەیی هاتن قەتلکرن. د عەینی رۆژێ دە، ب قەرارا دیوانا حەربێ یا بەدلیسێ رێبەرێن مللەتێ کورد عەلی رزا بەگ، به‌هائه‌ددین بەگ، فائق بەگ و مەلە عەڤدرەحمانێ شرنەخی ژی هاتن دارڤەکرن.
مخابن هەتا ئیرۆ جهێ گۆرێن خالد بەگێ جبری، یووسف زیا بەگ عەلی رزا بەگ، به‌هائه‌ددین بەگ، فائق بەگ و مەلە عەڤدڕحمانێ شرنەخی وەکە جهێ مەزەلێن شێخ سەعید، سەیید رزا و هەڤالێن وان سەعیدێ کوردی ئالیێ دەولەتا تركیێ ڤە نەهاتینە ئەشکەرە کرن.
ئەم ب ڤێ مناسەبەتێ جارەکە دن بانگی دەولەتا تركیێ دکن کو جهێ گۆرێن شێخ سەعید، سەید رزا و هەڤالێن وان، سەعیدێ کوردی، خالد بەگێ جبری، یووسف زیا بەگ، عەلی رزا بەگ، به‌هائه‌ددین بەگ، فائق بەگ و مەلە عەڤدڕحمانێ شرنەخی ئەشکەرە بکن.
ئەم وەکە (پارتییا وەلاتپارێزێن کوردستانێ) خوە بەردەوامییا رێبازا تەشکیلاتا ئازادییێ، بەردەوامییا تێکۆشینا شێخ سەعید، سەیید رزا، ئیحسان نووری پاشا، خالد بەگ و یووسف زیا بەگ و هەڤالێن وان دبینن و ژ بۆ ئارمانجا وان یا کوردستانەکە ئازاد تێدکۆشن.
د 99ەمین سالڤەگەرا شەهادەتا وان دە، ئەم خالد بەگێ جبری، یووسف زیا بەگ، عەلی رزا بەگ، به‌هائه‌ددین بەگ، فائق بەگ و مەلە عەڤدڕه‌حمان شرنەخی و هەموو شەهیدێن کوردستانێ ب رێزداری ب بیر تینن.
بورۆیا راگەهاندنێ یا پارتییا وەلاتپارێزێن کوردستانێ
14.04.2024
