تۆرا مافێن مرۆڤان یا کوردستانێ راگهاند کو د سالەکێ دە 39 کۆلبەر هاتنە کوشتن و 356 کۆلبەر ژی بریندار بوونە.
تۆرا مافێن مرۆڤان یا کوردستانێ ل سەر کۆلبەران راپۆرەک بەلاڤ کر و راگهاند کو ژ 21ێ ئادارا 2023یان هەتا 21ێ ئادارا 2024ان هەری کێم 39 کۆلبەرێن ژ رۆژهلاتێ کوردستانێ ب سەدەمێن جودا جانێ خوە ژ دەست دایە و 356 کۆلبەر ژی بریندار بوونە.
ل گۆری راپۆرێ 39 کۆلبەرێن جانێ خوە ژ دەست دایە، 27 ژ وان ب گوللـەیێن راستەراست یێن هێزێن ئەولەهیێ یێن ئیرانێ هاتنە کوشتن.
هەروها کۆلبەرەک ژی ب گولەیێن هێزێن پاراستنا سینۆری یێن ئیراقێ ڤە هاتیە کوشتن.
ل گۆری وێ راپۆرێ، 2 کۆلبەران دەما دخوەست ژ بەر هێزێن لەشکەری یێن ئیراقێ برەڤن د بوویەرێن ترافیکێ دە جانێ خوە ژ دەست دایە.
د راپۆرێ دە هاتە دەستنیشانکرن کو 2 کۆلبەر ژ سەر چیایێ کەتنە خوار و جانێ خوە ژ دەست دایە، 2 کۆلبەر د رووباری دە خەندقینە، کۆلبەرەک ب کریزا دل و کۆلبەرەک ژی د بوویەرا ترافیکێ دە جانێ خوە ژ دەست دایە.
د سالەکێ دە 356 کۆلبەر بریندار بوونە
ل ئالیێ دن، ل گۆری تۆرا مافێن مرۆڤان یا کوردستانێ، ژ 21ێ ئادارا 2023یان هەتا 21ێ ئادارا 2024ان 356 کۆلبەر بریندار بوونە.
ژ وان 311 کەس ب گولەیێن هێزێن ئەولەهیێ یێن ئیرانێ، 8 کەس ب لێدانێ، 6 کەس ژ سەر چیایی کەتنە خوارێ و 5 کەس ژی ب گوللـەیێن هێزێن پاراستنا سینۆری یێن ئیراقێ بریندار بوونە.
هەروها 11 کۆلبەر د بوویەرێن ترافیکێ دە، 9 کەس ژ دەڤەرێن بلند کەتنە خوارێ و 6 کەسێن دن ژی ب تەقینا مایینان بریندار بوونە.
ژ وان کۆلبەرێن کو ب گوللـەیێن هێزێن ئەولەهیێ یێن ئیرانێ بریندار بوونە 15 کەس زارۆک بوونە.
کۆلبەر زێدەتر کەلووپەلێن ناڤ مالێ و جلووبەرگان ڤەدگوهێزن کو ئەو ب خوە ژی نە خوەدیێ وان بارانه، کۆلبەر کەلووپەلێن بازرگانان ل بەرامبەری پەرەیێن کێم ژ سینۆر دەرباسی ئالیێ رۆژهلاتێ کوردستانێ دکن و دبێژن: ژ بەر نەبوونا دەرفەتا کار وان بەرێ خوە دایە ڤی کاری و ئەگەر دەرفەتا کار هەبە ئەو جانێ خوە ناخن مەترسیێ.
