رەڤاندنا زارۆکان و لەشکەرکرنا وان ژ ئالیێ چەتەیێن ب ناڤێ “جوانێن شۆرەشگەر” ڤە کو راستەراست فەرمانا ژ قەندیلێ وەردگرن ل تەڤایا دەڤەرێن د بن کۆنترۆلا هەسەدێ دە بەردەوامە، ھەری داوی ژی چەتەیێن پەکەکێ 3 زارۆک د دەما هلکرنا ئاگرێ نەورۆزێ ل باژارێ کۆبانێ رەڤاندن.
ل گۆر ئاگاهیان، چەتەیێن پەکەکێ یێن ب ناڤێ “تەڤگەرا جوانێن شۆرەشگەر” د رۆژا 21/3/2024 دە ل گرێ مشتەنۆرێ یێ باژارێ کۆبونێ د دەما بڕیڤەچوونا رێ و رەسمێن هلکرنا ئاگرێ نەقرۆزێ 3 زارۆک دو ژێ کەچ رەڤاندنە.
ناڤێن زارۆکێن رەڤاندی ب ڤی ئاوانە، سەرهەند رەشاد عەلی، ژ شێنیێن گوندێ بۆریز، رۆهلات یەحیا عۆسمان، ژ شێنیێن گوندێ بیر مەحلێ و فاتیما عیماد ئەحمەد ژ شێنیێن کۆبانێ. تەمەنێ گشت زارۆکێن رەڤاندی ژی د بن 18 سالیێ دە یە.
گرۆپا “جوانێن شۆرەشگەر” گرۆپەکا چەتەیێن رۆژئاڤایێ کوردستانێ یە کو پرانیا وان گەنجێن ژ قۆتابخانەیێ ڤەقەتیایی نە و بێ کارن و راستە راست ب فەرمانا پەکەکێ کار دکەن. ئەڤ چەتە بەردەوام زارۆکێن تەمەنێ وان د بن 18 سالیێ دە ل رۆژئاڤا و دەڤەرێن د بن دەستهلاتا هەسەدێ دە درەڤینن و ب نەچاری وان چەکدار دکن.
تێ زانین، فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
