پاتریکێ دێرا کلدانان ل ئیراق و جیھانێ ئاماژەیێ ددە کو سەرۆککۆمارێ ئیراقێ ژ وێ رەوشێ بەرپرسە یا کو د دەرحەقا وی دە ھاتیە چێکرن. ھەروەسا دبێژە کو، سەرۆک بارزانی و ھەرێما کوردستانێ گەلەک پشتەڤانیا وی کریە.
پاتریکێ دێرا کلدانان ل ئیراق و جیھانێ کاردینال لۆیس ساکۆ ئیرۆ 15 نیسانا 2024 د کۆنفرانسەکا رۆژنامەڤانی دە ل ھەولێرێ راگەھاند، “دەما رێکخستنا قاعیدەیێ یا ئیسلامی و پاشتر رێکخستنا داعشێ ژی ئێریش کری سەر کرستیانان ل دەڤەرێن جودا جودایێن ئیراقێ، حکوومەتا ئیراقێ چ ئالیکاریەک ژ بۆ پاراستن و راگرتنا وان پێشکێش نەکر، بەلکی دێرێ جھێ خوەپاراستنێ و خوارن و پێدڤیتی ژ بۆ خەلکی پەیدا دکرن”.
پاتریکێ دێرا کلدانان ل ئیراق و جیھانێ ئاماژە ژی دا کو وێ دەمێ سەردانا سەرۆککوەزیرێ ئیراقێ کربوو و داخوازا ئالیکاریێ ژێ کربوو لێ سەرۆکوەزیر ژێ رە گۆتبوو کو پەرە ژ بۆ پێشکێشکرنا ئالیکاریان تونەیە.
کاردینال لۆیس ساکۆ بەحس ژی کر کو پاشتر سەردانا مووسل و کەرکووکێ ژی کربوو و خەلک و رێکخستنێن خێرخوازی، کو خەلکێ مسلمان و یێن دن ژی د ناڤ دە بوون، ئالیکاریا وان کربوو.
ناڤبری رۆن ژی کر کو ھەر د وێ چاچۆڤەیێ دە ھەرێما کوردستانێ ئالیکاریەکا زێدە پێشکێشی وان کر و ژ بۆ وێ مەرەمێ ژی داخوازا ئالیکاریێ ژ سەرۆکۆمار کر لێ ژ بەر لھەڤکرنا وی ب ئالیەکی ئیراقی رە ئالیکاریا وان نەکر.
پاتریکێ دێرا کلدانان ل ئیراق و جیھانێ تەکەز ژی کر کو ڤەگەریانا وی ژ بۆ بەغدایێ ب پشتەڤانیا ھەرێما کوردستانێ و پێشەنگیا سەرۆکوەزیرێ ئیراقێ محەمەد شیاع سوودانی و گڤاشتنێن ناڤدەولەتی بوو.
کاردینال لۆیس ساکۆ د بەرسڤا پرسەکی دە ژی راگەھاند کو، سەرۆکۆمارێ ئیراقێ ژ وێ رەوشێ بەرپرسەیا کو د دەرحەقا وی دە ھاتیە چێکرن. ھەروەسا گۆت، “سوودانی ژ بۆ چارەکرنا وێ ئارێشەیێ بزاڤێ دکە و مەرەما وی ئەوە کو رێزێ ژ کرستیانان رە ڤەبگەرینە”.
ھەروەھا راگەھاند، سەرۆک بارزانی و ھەرێما کوردستانێ گەلەک پشتەڤانیا وی کریە.
ئەڤ د دەمەکێ دەیە کو پار مەھا تیرمەھێ ژ بەر ژێ ستاندنا مەرسووما کۆماری ژ ئالیێ سەرۆکۆمارێ ئیراقێ ڤە ژ بۆ دەستنیشانکرنا وی وەکی پاتریک و سەرۆکێ دێرا کلدانان ل ئیراق و جیھانێ، لۆیس ساکۆ ژ بەغدایێ دەرکەفتبوو.
