درۆنێن ترکیەیێ گوندەکی سلێمانیێ بۆمبەبارانکر

قایمەقامێ ماوەتێ راگھاند، گوندێ کورالە یێ ل ناڤچەیا شارباژێر ل پارێزگەھا سلێمانیێ ھات بۆمبەبارانکرن.

قایمەقامێ ماوەتێ کامەران حەسەن گۆت، د بۆمبەبارانێ دە خانیەکی گوند رووخیا و ھەروھا چیایێن تەژە و شیلانشێ ژی ھاتن بۆمبەبارانکرن.

ھەروھا کامەران حەسەن گۆت، بۆمبەباران ژ ئالیێن درۆنێن ترکیەیێ ڤە بوون.

ئەڤ د دەمەکێ دەیە، ل گۆری رێخستنا جەپەتێ ژ مەھا تەباخا بۆری و ڤر ڤە د ئەنجاما بۆمبەبارانا ئارتێشا ترکیەیێ دە، 152 سڤیلان ل ھەرێما کوردستانێ جانێ خوە ژدەست دانە و 228 سڤیل ژی بریندار بوونە.

پێشتر ژی وەزیرێ ناڤخوەیێ ترکیەیێ عەلی یەرلیکایا ل سەر تۆرا جڤاکی “X” راگەھاندبوو، ئارتێشا ترکیێ د سالا 2023 دە 23 ھەزار و 593 ئۆپەراسیۆنێن لەشکەری ل دژی پەکەکێ کرنە.