پشتی سەردانا سەرۆکوەزیرێ هەرێما کوردستانێ بۆ ئامەریکایێ و هەڤدیتنێن وی ب بەرپرسێن پایەبلندێن وی وەلاتی رە، راستەراست ئەنجامێن چارەسەرکرنا پرسگرێک و قەیرانان دیار بوون.
پرسگرێکا پاشخستنا مووچەیێن هەرێما کوردستانێ ژ ئالیێ حكوومه‌تا فەدەرال ڤە، ئەوقاس درێژ بوون، هەتا گهیشت گرینگترین ناڤەندا سیاسی، کو کۆشکا سپی ل سەر باخڤە.
د جڤینا سەرۆکوەزیرێ ئیراقێ محەمەد شه‌یاع سوودانی و سەرۆکێ ئامەریکایێ جۆ بایدن دە، بەشەک ژ گۆتووبێژان ل سەر مژارا مووچەیێن کارمەندێن هەرێما کوردستانێ بوو، ئەڤ یەک ژی نیشانەیا گرنگیپێدانا ئامەریکایێ ب مافێن دەستووری و دارایی یێن هەرێما کوردستانێ یە.
پسپۆرێ پەیوەندیێن ناڤدەولەتی د.. سەرسام شوانی د ڤێ دەربارێ دە ژ ک24ێ گۆت: «هەرێما کوردستانێ وەکە هەرێمەکە ناڤدەولەتی، خوەدی حەسابەکی تایبەتە. ئەو پرسگرێکێن ل ناڤخوەیا هەرێما کوردستانێ هەنە، بێگومان باندۆرێ ل رەوشا ناڤچەیێ ژی دکە. د جڤینا سوودانی و بایدن دە تەکەزی ل سەر چارەسەرکرنا پرسگرێکێن د ناڤبەرا حكوومه‌تێن ئیراق و هەرێما کوردستانێ دە هاتە کرن».
بەریا سەرۆکوەزیرێ ئیراقێ، سەرۆکوەزیرێ هەرێما کوردستانێ مەسروور بارزانی سەردانا ئامەریکایێ کربوو و ل ور هەمان مژار هاتن گۆتووبێژکرن. هن پسپۆر دبێژن، ئامەریکا چارەسەرکرنا کێشەیێن گرێدایی ماف و شایەستەیێن هەرێمێ، کریە مەرج ژ بۆ بەردەوامیا پشتەڤانیکرنا ل حكوومه‌تا سوودانی و هەتا پێکانینا جڤینا ب بایدن رە ژی.
چاڤدێرێ سیاسی د. رامیار رازگار دبێژە: «ئەڤ مژار ژ وێ چارچۆڤەیێ دەرکەتیە کو ب هەر سەدەمەکێ رێ ل شاندنا مووچەیێن فەرمانبەرێن هەرێما کوردستانێ بێ گرتن و خەلکێ هەرێما کوردستانێ بێ سزادان».
ژ ئالیێ دن ڤە، بەردەڤکێ وەزارەتا دارایی و ئابۆری یا حكوومه‌تا هەرێما کوردستانێ هونار جەمال دوهی د جڤینەکە رۆژنامەڤانیێ دە راگهاند، «ئەم د وێ باوەریێ دەنە کو پرسگرێکا مووچە ب تەمامی هاتیە چارەسەرکرن. سەرۆکوەزیرێ ئیراقێ محەمەد شه‌یاع سوودانی د سەردانا ڤێ هەفتەیێ یا ئامەریکایێ دە، تەکەزی ل سەر وێ یەکێ کر کو پرسا مووچەیێن فەرمانبەرێن حكوومه‌تا هەرێما کوردستانێ چارەسەر بوویە و پرسا مووچەیێ ئێدی نابە پرسگرێک، ژ بەر کو ئەو مافەکی بنگەهین یێ فەرمانبەرێن هەرێما کوردستانێ یە».
چاڤكانی: كوردستن 24
