“ئەولەکاریا ئیراقێ” رەد دکە چ بارەگەھەکێ حەشدا شەعبی ھاتبە بۆمبەبارانکرن

شانەیا راگھاندنێ یا ئەولەکاریا ئیراقێ دبێژە، تەقینا ئیرۆ بەربانگێ ل بارەگەھەکا حەشدا شەعبی ل پارێزگەھا بابلێ نە ژ بەر بۆمبەبارانێ بوو.

شانەیا راگھاندنێ د داخویانیەکێ دە بەلاڤ کر، ئیرۆ دەمژمێر 01:00 تەقین و ئاگر د ناڤا بارەگەھێن ئارتێش، پۆلیس و حەشدا شەعبی ل پارێزگەھا بابلێ روو دان، د ئەنجامێ دە ئەندامەکی حەشدا شەعبی جانێ خوە ژدەست دا و 8 کەسێن دن بریندار بوون.

شانەیا راگھاندنێ دیار کر، شەوات ب ھەولدانێن تیمێن شارستانیا سڤیل یا بابلێ ھات کۆنترۆلکرن و کۆمیتەیەکا تەکنیکی ژ بۆ لێکۆلینکرنا تەقین و ئاگر ھات ئاڤاکرن.

ئەڤ یەک پشتی وێ تێ، مەدیایا ئیراقی راگھاندبوو، ئیرۆ دەمژمێر 02:00 سبێ ئێریشەکا ئاسمانی ل سەر بارەگەھەکا ھێزێن حەشدا شەعبی ل ناڤچەیا کالسویا ل باکورێ پارێزگەھا بابلێ ھاتبوو کرن.

پشترە ژی، فەرمانداریا ناڤەندی یا ئامەریکایێ (سێنتکۆم) داخویانیەکا کورت ل سەر تۆرا جڤاکی “X” بەلاڤ کر و راگھاند کو ھایا وان ژ ئێریشا ڤێ سبێ یا ل دژی حەشدا شەعبی نینە.

بارەگەھا لەشکەری یا کالسو، 20 کیلۆمەترە ل باشوورێ بەغدایێ یە، د سالا 2011 دە پشتی ڤەکشینا لەشکەرێن ئامەریکی ھاتبوو گرتن. لێ پشترە بوو بارەگەھا لیوایێن 17 و 28 یێن حەشدا شەعبی.