سەردۆزگەریا کۆماری یا دیاربەکرێ، ئالایێن کوردستانێ یێن کو د سالا 2022 دە د ئەنجاما ئۆپەراسیۆنا ل دژی پاک، پەسەکێ و حەرەکەتا ئازادی دە ھاتبوون دەستەسەرکرن، ژ بۆی وان پارتیان ڤەدگەرینە.
نڤێسینگەها راگەھاندنێ یا پارتیا وەلاتپارێزێن کوردستانێ (PWK) ئیرۆ 20 نیسانا 2024 د داخویانیەکێ دە راگھاند، سەردۆزگەریا کۆماری یا دیاربەکرێ بریار دا کو ئالایێن کوردستانێ یێن د سالا 2022 دە ژ ئالیێ ھێزێن ئەولەھیێ ڤە ھاتبین دەستەسەرکرن، بۆ پارتیێن پاک، پەسەکێ و حەرەکەتا ئازادی بێنە ڤەگەراندن.
نڤێسینگەها راگەھاندنێ یا PWK د داخویانیەکێ دە راگھاند، سالا 2022، د رۆژا ئالایا کوردستانێ دە، ھێزێن ئەولەھیێ یێن دیاربەکرێ ب ئۆپەراسیۆنەکێ ب سەر ئاڤاھیێن پاک، پەسەکێ و حەرەکەتا ئازادی د گرتبوون و ھەر چقاس، رێڤەبرێن وان پارتیان ل بەر خوە دابوون ژی، لێ پۆلیسان ب ئاوایەکی نە یاسایی دەست دانیبوون سەر ئالایێن کوردستانێ و ھەموو دۆکومەنتێن ل وان ئاڤاھیان.
PWK دیار کر، پشتی ڤێ ئۆپەراسیۆنێ، رێڤەبرێن پاک، پەسەکێ و حەرەکەتا ئازادیێ ل سەردۆزگەریا کۆماری یا دیاربەکرێ ئیفادە دابوون و نەرازیبوونا خوە ل سەر ڤێ ئۆپەراسیۆنێ و دەستدانینا سەر ئالایێن کوردستانێ دیارکرن و گۆتن ئالایێ کوردستانێ نە قەدەغەیە و ئەو قەدەغەیەکا وەھا ناس ژی ناکن.
ھەروھا د داخویانیێ دە ھات دیارکرن، سەردۆزگەریا کۆماری یا دیاربەکرێ دوھی 19/4/2024، بریارا “پێویستی ب ت دۆزا نینە”، بریارا “بێ تاقیبیێ” دا و ھەموو ئالایێن کوردستانێ بۆ PWK (کو پێشتر پاک بوو) پەسەکە و حەرەکەتا ئازادیێ ڤەگەراندن.
PWK بال کشاندە سەر وێ یەکێ کو ئەڤ بریارا سەردۆزگەرییا کۆماری یا دیاربەکرێ و ڤەگەراندنا ئالایێن کوردستانێ، ب ئاوایەکی وەک فەرمی، پەسندکرنا وێ یەکێ یە کو ئالایێ کوردستانێ نە قەدەغەیە.
PWK د داویا داخویانیا خوە دە ئاماژە ب گرنگیا ڤێ بریار کر و گۆت: ھەر چقاس دەولەتا ترکییێ، گەلەک جاران بریارێن خوە تونە حەسباندبن و قانوونێن خوە بنپێ کربن ژی، لێ ئەڤ بریارا سەردۆزگەرییا کۆماری یا دیاربەکرێ و ڤەگەراندنا ئالایێن کوردستانێ، دەرفەتەکا گرینگە.
