کۆمێن چەکدارێن گرێدایی پەکەکێ ل شنگالێ پەیمانا پێکڤەژیانا جڤاکی یا کو د داویا مەھا ئادارێ دە د ناڤبەرا عەشیرێن عەرەب، ئالیێن ئیسلامی و ئێزیدی دە ھاتبوو ئیمزەکرن رەد کرن، کو ئارمانجا وێ دوبارە ئاڤەدانکرنا باژێر، ئاشتیا جڤاکی و پێکڤەژیانا ھەڤبەشە.
رۆژا 30 ئادارا بۆری، ھەژمارەک ژ سەرۆکێن عەشیرێن عەرەب و ئێزدی، ژ بۆ پێکانینا ئاشتی و پێکڤەژیانا ھەڤبەش د ناڤبەرا ھەر دو جڤاکان دە، پەیمانەک ب ناڤێ پێکڤەژیانا جڤاکی ئیمزە کرن. تشتێن ھەری گرینگ د ناڤا وێ پەیمانێ دە، نووئاڤاکرنا دەڤەرێ، کۆمکرنا ھەموو دۆسیەیێن تاوان و تەرۆرێ بۆ دەزگەھێن دادوەری و ئەولەھیێ و ڤەگەرا خەلکێ بۆ مال و گوندێن خوە بوون.
ھەروھا د پەیمانێ دە داخواز ھاتیە کرن کو رەوشا ئەولەکارییا باژار و دەردۆرا وێ بهێت یەککرن و ھەموو ھێزێن چەکدار ب یەک ئیدارەیێ بن و ب حکوومەتێ ڤە بهێن گرێدان. ھەروھا پرۆسەیا قەرەبووکرنا کەسێن کو زیان دیتنە، ب تایبەتی خزمێن قوربانیان بێ کرن، پرۆژەیێن دابینکرنا ئاڤا ڤەخوارنێ، پرۆژەیێن ئاڤدانێ ژ بۆ رووبرووبوونا باندۆرێن گوھەرینا کەشووھەوایێ و پێشخستنا سەکتۆرا چاندنیێ ل ھەرێمێ بێن جبجیکرن.
زێدەتری نەھ سالان ژ پشتی رزگارکرنا شنگالێ ژ داعشێ، گەلەک کۆچبەر ژ ترسا نەبوونا ئەولەھی و کۆنترۆلکرنا دەڤەرێن وان ژ ئالیێ ملیس و کۆمێن چەکدار ڤە رەد دکن کو ڤەگەرن مالێن خوە.
ل سەر ڤێ یەکێ، محەمەد عەدنان کو کەسەکی ناڤدارێ عەشیرا ئەل-بۆحەمدانە گۆت، یێن کو ل دژی پەیمانێ نە، کەسێن نێزیکی پەکەکێ، ھەڤالبەندێن ئیرانێ و یێن د ناڤ کۆمێن چەکدارێن ئیراقێ دە نە.
گۆت ژی، د پەیمانێ دە پشتگریکرنا شنگالێ و چارەسەرکرنا پرسگرێکێن جڤاکی و دانینا پلانەکا بنگەھین ژ بۆ ڤەگەراندنا کۆچبەرێن کو ئەڤ نێزی 10 سالن ل کامپان دژینە. ھەروھا جبجیکرنا ڤێ پەیمانێ ژ بۆ ئارامی و ئاشتیا جڤاکی و پێکڤەژیانا ھەڤبەشا پێکھاتەیان ل شەنگالێ، گاڤەکە ئەرێنی یە.
