ب ئامادەبوونا سەرۆکوەزیرێ هەرێما کوردستانێ، ئیرۆ 22ێ نیسانێ سێیەمین دیدارا ناڤدەولەتی یا رۆژنامەگەریێ ب درووشما پاراستنا رۆژنامەگەرێن ژن ژ جوداکاریا زایەندی، ل هەولێرێ هات لدارخستن.
سەرۆکوەزیر مەسروور بارزانی د دیدارێ دا گۆتارەک پێشکێش کر و تێ دە راگهاند، «ل هەرێما کوردستانێ کارێ راگهاندنێ ب تەڤاهی ئازادە و حكوومه‌تا هەرێما کوردستانێ ژی پابەندە کو د چارچۆڤەیا یاسایێ دە ژینگەهەکە گونجاو ژ بۆ رۆژنامەڤانی و ئازادیا دەربرینێ دابین بکە».
دەقا پەیاما سەرۆکوەزیر مەسروور بارزانی:
ب ناڤێ خوەدایێ مەزن و دلۆڤان
ئامادەبوویێن برێز
مێڤانێن هێژا
ئەز دلخوەشم کو د ڤێ دیدارا رۆژنامەگەریێ دە ب وە رە مە. ب تایبەتی ب خێرهاتنا هەموو رۆژنامەڤان و مەدیاکارێن کو ژ چار ئالیێن جیهانێ هاتنە، ژ بۆ بەشداری ڤێ دیدارێ بکن. هوون ب خێر هاتنە. هێڤیا سەرکەفتنێ ژ وە رە دخوازم و هێڤیدارم کو ئەنجام و پێشنیارێن ڤێ دیدارێ د خزمەتا پێشکەتنا کارێ رۆژنامەگەریێ دە بن.
هەروها ب بۆنەیا رۆژا رۆژنامەگەریا کوردی و سالڤەگەرا دامەزراندنا یەکیتیا رۆژنامەڤانێن کوردستانێ، گەرمترین پیرۆزباهیێ ئاراستەیی هەموو رۆژنامەڤانێن کورد دکم و هێڤیا سەرکەفتنێ و پێشکەتنێ ژ بۆ وان دخوازم.
حكوومه‌تا هەرێما کوردستانێ هەرتم ب رێز و پێزانینێ ڤە ل رۆلا گرنگا رۆژنامەڤانان و پیشەیا رۆژنامەڤانیێ دنێرە کو ب ئاوایەکی پیشەیانە و بەرپرسیانە ئەرک و پەیامێن خوە یێن راستەقینە د چارچۆڤەیا یاسا و ئەتیکا رۆژنامەڤانی و پیڤانێن ناڤدەولەتی دە جیبجی بکن، ب تایبەتی د وارێ هشیارکرنا جڤاکێ، گهاندنا زانیاریێن راست، دەستنیشانکرنا کێماسی و بنپێکرنان و پشتگریا پرۆسەیا چاکسازیێ دە. ب ڤی ئاوایی ژی، راگهاند وەکی دەستهلاتا چارەم، رۆژنامەڤان ئالیکاریەکی گرینگێ سازیێن حكوومه‌تێ نە و ب هەڤ رە کار ژ بۆ پێشدەبرنا جڤاک و وەلات دکن.
ل هەرێما کوردستانێ کارێ راگهاندنێ ب تەمامی ئازادە و حكوومه‌تا هەرێما کوردستانێ ژی پابەندە کو د چارچۆڤەیا یاسایێ دە ژینگەهەکە گونجاو ژ بۆ رۆژنامەڤانی و ئازادیا دەربرینێ دابین بکە.
جهێ دلخوەشیێیە کو هەرێما کوردستانێ خوەدیێ یاسایەکە پێشکەفتی یا رۆژنامەڤانیێ یە و ژ بەر کارێ رۆژنامەڤانی و ئازادیا راگهاندنێ ل هەرێما کوردستانێ گەلەک باش بپێش کەتیە.
ئازادیا رۆژنامەڤانیێ ل کوردستانێ گهەشتیە ئاستەکێ کو نەحەزێن هەرێما کوردستانێ بەردەوام د هەولا ب خراپی بکارئانینا ڤێ ئازادیانە کو ل ناڤچەیێ کێمە، ئەڤ ژی بۆ لێدانا ل بنەمایێن دەمۆکراسی و قەوارەیا کوردستانێ کو ب ناڤێ رۆژنامەگەریێ، کەسێن دژایەتیا هەرێما کوردستانێ دکن.
ئەز بانگ ل رۆژنامەگەرێن برێز، سەندیکا و رێخستنێن تایبەتێن ب رۆژنامەگەران دکم کو رێ نەدن ئەڤ پیشەیا گرینگ ببە سەکۆیەک ب خراپی بکارئانینا ئازادیا راگهاندن و دەربرینێ.
دەستخوەشیێ ل کۆمیتەیا جەندەری یا فەدەراسیۆنا رۆژنامەگەرێن ناڤدەولەتی دکم کو هەولێر ژ بۆ ئەنجامدانا ڤێ دیدارێ هلبژارتیە. هێڤیدارم ئەڤ پێنگاڤ ببە دەرفەتەک ژ بۆ پێکانینا کار و پرۆژەیێن هەڤبەش ل گەل یەکیتیا رۆژنامەڤانێن کوردستانێ.
دەربارێ مژارا سەرەکە یا دیدارێ دە، کو تایبەتە ب پاراستنا رۆژنامەڤانێن ژن ژ جوداهیا رەگەزی زایەندی، حكوومه‌تا هەرێما کوردستانێ ئامادەیە هەڤاهەنگی و هەڤکاریا پێویست ل گەل سەندیکایا رۆژنامەگەران و هەموو ئالیێن پەیوەندیدار بکە ژ بۆ نەهیشتنا هەموو پرسگرێک و ئاستەنگیێن ل پێشیا رۆژنامەڤانێن ژن و نەهیشتنا هەر توندووتووژی و جوداکاریێن کو ل وان تێ کرن. د ڤی واری دە هەر چ پێویست بە ل سەر حكوومه‌تێ دکە، ژ بۆ بداویئانینا هەموو ئاستەنگیێن ل پێشیا رۆژنامەگەرێن ژن تا کو بکارن ئەرکێ خوە ب ئاوایەکی پیشەیانە بجهـ بینن.
د داویێ دە، دوبارە رۆژا رۆژنامەگەریا کوردی و سالڤەگەرا دامەزراندنا یەکیتیا رۆژنامەڤانێن کوردستانێ پیرۆز بە و هێڤیا سەرکەفتنێ ژ بۆ کارێن ڤێ دیدارێ دخوازم.
هەر شاد و سەرکەفتی بن
