سەرۆککۆمارێ ترکیەیێ ب سەردانەکە فەرمی گەهشت هەولێرا پایتەختا هەرێما کوردستانێ.
بەری دەمەکە کێم سەرۆککۆمارێ ترکیەیێ رەجەپ تاییپ ئەردۆگان ب رێیا بالافرخانەیا ناڤدەولەتی یا هەولێرێ گەهشت هەولێرێ و ژ ئالیێ سەرۆکێ هەرێما کوردستانێ نێچیرڤان بارزانی و سەرۆکێ حکوومەتا هەرێما کوردستانێ مەسروور بارزانی ڤە پێشوازی لێ هات کرن.
سەردانا ئەردۆگان یا ژ بۆ هەولێرێ پشتی سەردانا وی یا ژ بۆ بەغدایێ تێ، کو سەعەت 11:00ێ سبەها ئیرۆ دوشەم، 22/04/2024 گەهشت بالافرخانەیا ناڤدەولەتی یا بەغدایێ و ژ ئالیێ سەرۆکوەزیرێ ئیراقێ محەمەد شه‌یاع سوودانی ڤە پێشوازی لێ هات کرن. پشتی جڤینان ژی، ئیمزا ل سەر 26 پەیمان و یاداشتێن لهه‌ڤگه‌هشتنێ هاتن کرن.
د سەردانا خوە یا ژ بۆ هەولێرێ دە، سەرۆککۆمارێ ترکیەیێ رەجەپ تاییپ ئەردۆگان دێ ب سەرۆک مەسعوود بارزانی، سەرۆکێ هەرێما کوردستانێ نێچیرڤان بارزانی و سەرۆکێ حکوومەتا هەرێما کوردستانێ مەسروور بارزانی رە بجڤە و دانوستاندنان ل سەر پەیوەندیێن ناڤبەرا هەولێر و ئەنقەرەیێ بکە.
ئەڤ سەردانا ئەردۆگان د دیرۆکێ دە دبە سەردانا یەکێ یا سەرۆککۆمارێ ترکیەیێ ژ بۆ هەرێما کوردستانێ. ئەڤ د دەمەکێ دە یە کو بەری 13 سالان ئەردۆگان کو وێ دەمێ سەرۆکوەزیرێ ترکیەیێ بوو دیسا سەردانا هەولێرێ کربوو و ب سەرۆک بارزانی رە تەڤلی ڤەکرنا بالافرخانەیا ناڤدەولەتی یا هەولێرێ بووبوو.
