سەرۆکێ ھەرێما کوردستانێ گەھشت بەغدایێ و بریارە ل دەستپێکێ لگەل سەرۆکوەزیرێ ئیراقێ بجڤە و سبە ژی لگەل سەرۆککۆمارێ ئیراقێ لەتیف رەشید و سەرۆکێ جڤاتا دادوەری فایەق زێدان و ھەژمارەکا سەرکردە و ھێزێن سیاسی یێن دن بجڤە.
سەرۆکێ ھەرێما کوردستانێ نێچیرڤان بارزانی ئیرۆ (شەمبیێ، 27/4/2024) گەھشت بەغدایێ و بریارە ل دەستپێکێ لگەل سەرۆکوەزیرێ ئیراقێ محەمەد شیاع سوودانی بجڤە.
ل گۆر زانیاریان، گرنگترین پرسا جڤینا سەرۆکێ ھەرێما کوردستانێ نێچیرڤان بارزانی لگەل سەرۆکوەزیرێ ئیراقێ محەمەد شیاع سوودانی دێ گرێدایی ئێریشا درۆنی یا ل سەر زەڤیا کۆرمۆرێ یا گازێ و ھەروەسا پرسا ھلبژارتنێن پەرلەمانا کوردستانێ و ھەژمارەکا مژارێن دن تێن گرێدایی ھەرێما کوردستانێ بە.
ھەروەسا بریارە ھەر ئیشەڤ سەرۆکێ ھەرێما کوردستانێ و سەرۆکوەزیرێ ئیراقێ تەڤلی جڤینا ھەڤپەیمانیا برێڤەبرنا دەولەتێ ببن، کو گرێدایی ئەنجامێن سەردانا سوودانی یا ژ بۆ ئامەریکایێ و ھەروەسا سەردانا ئەردۆگان یا ژ بۆ بەغدا و ھەولێرێ یە.
ھەروەسا بریارە د وێ جڤینێ دە دانووستاندن ل سەر پرسا دەستپێکرنا ھناردەکرنا پەترۆلا ھەرێما کوردستانێ و پێکانینا حکوومەتا خوەجھی یا کەرکووکێ ژی بێن کرن.
نێچیرڤان بارزانی ئیشەڤ ل بەغدایێ دمینە، سبە (یەکشەمبێ، 28/4/2024) لگەل سەرۆککۆمارێ ئیراقێ لەتیف رەشید و سەرۆکێ جڤاتا دادوەری فایەق زێدان و ھەژمارەکا سەرکردە و ھێزێن سیاسی بجڤە.
