رێخستنا جوانێن شۆرەشگەر یا گرێدایی پارتیا کارکەرێن کوردستانێ “پەکەکێ”، ل باژارێ رەقایێ، زارۆکەکی تەمەن بچووک کو ئەسلێ خوە ژ کۆبانێ یە ب ئارمانجا چەکدارکرنا وی د ناڤا رەفێن خوە دە رەڤاند.
ل گۆری چاڤکانیێن ھەرێمی رێخستنا جوانێن شۆرەشگەر زارۆکێ ب ناڤێ ئامەد محەمەد خەلیل (14 سالی) کو ناڤێ دایکا وی فەریالە دەما کو دچوو فرۆشگەھەکێ رەڤاند، ئامەد محەمەد ژ گوندێ کالتا یێ باشوورێ کۆبانێ یە.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا رێخستنا “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیروباوەرێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
