به‌غدا رۆناهیا کەسک ددە ئەنقەرەیێ كو ل دژی په‌كه‌كێ ئێریشان بكه
حكوومه‌تا ئیراقێ ده‌ستوور دا یه ده‌وله‌تا ترك ل هه‌رێمێن سینۆری ل په‌ی پارتیا كاركه‌رێن كوردستانێ بكه‌ڤه و ئیریشێن ل دژی وێ رێخستنێ بدۆمینه، لێبه‌لێ ت سۆزه‌ك ب تركان ره نه‌دا كو راسته‌راست ته‌ڤلی شه‌رێ ل دژی په‌كه‌كێ ببه.
چاڤکانیەکی ئاگەهدار یێ ئیراقێ ئیرۆ رۆژا چارشه‌می 1/5/2024ێ ئەشکەرە کر کو رێکەفتنەکە ئیراق و ترکیێ دەربارێ شۆپاندنا پارتیا کارکەرێن کوردستانێ ل هەرێمێ هەیە و ل گۆری وێ ئیراقێ ده‌ستوور دا یه تركیێ ئێریشێن ل دژی په‌كه‌كێ به‌رده‌وام بكه.
په‌یمانا ستراته‌ژیك یا ل دژی په‌كه‌كێ
چاڤکانیا هان د هەڤپەیڤینەکێ دە لگەل «مه‌وازین نیۆز»ێ گۆت: «سەرۆکۆمارێ ترکیێ رەجەب تەیب ئەردۆگان ب حكوومه‌تا ئیراقێ ره، ئۆپەراسیۆنەکە نوو یا لەشکەری ل دژی چەکدارێن پارتیا کارکەرێن کوردستانێ ل ئیراقێ نیقاش كر، هه‌ردو ئالی ده‌ربارێ ڤێ مه‌سه‌لێ گهیشتن رێككه‌فتنه‌كێ».
هات راگهاندن به‌غدا و ئەنقەرێ پەیمانا چارچۆڤەیا ستراتەژیک ژ بۆ هەڤکاریا هەڤبەش ئیمزە کرن، ترکیە ب ئارمانجا پێشیگرتنا ل تەڤگەرێن چه‌كدارێن په‌كه‌كێ، پێشنیار كر ئالیکاریا تەکنیکی پێشکێشی ئیراقێ بکە دا کو ئەولەهیا سینۆرێن ئیراقێ زێدە بکە.
ل گۆری چاڤكانیێن ده‌ردوورا شه‌یاع سوودانی، ئیراق ب ت ئاوایی ژ ئالیێ له‌شكه‌ری ڤه ته‌ڤلی شه‌رێ ل دژی په‌كه‌كێ نابه، لێ د هه‌مان ده‌مێ ده رۆناهیا كه‌سك دایه ئه‌نقه‌رێ كو ل هه‌رێمێن سینۆری ئێریشێن خوه به‌رده‌وام بكه.
پێكئانینا ئۆده‌یا هه‌ڤبه‌ش یا ئۆپه‌راسیۆنان
تركیه چاڤه‌رێ دكر د ناڤبەرا وێ و ئیراقێ دە ئۆدەیەک هەڤبەش هەبە کو ئارتێش و یەکینەیێن هەوایی یێن ئیراقێ بەشدار ببن دا کو هەبوونا هێزێن ترکیێ ل ئیراقێ رەوا بکن. لێ خویایە حکوومەتا ئیراقێ پێ حەسیایە کو چوونا ناڤ ڤێ مژارێ دێ بارگرانیێن دارایی و لەشکەری بدە به‌غدایێ.
سەرۆکۆمارێ ترکیێ ئێڤارا دوشەمێ 22/4/2024ێ سه‌ردانا بەغدایێ كر و ب سەرۆکوەزیرێ ئیراقێ رە هەڤدیتن کر.
د ئه‌نجاما دانوستاندنان ده، به‌غدایێ قەبوولکر په‌كه‌كه وەک «رێخستنەکە قەدەغە» ناسبكه، هه‌ر وها د وارێن ئەولەکاری، بازرگانی، ئاڤ، گەشەپێدان و وارێن دن دە 26 پەیمان و پەیماننامە هاتن ئیمزە کرن.
تاییپ ئەردۆگان ل 19 ئادارا ئیسالێ گۆتبوو، ئه‌وێ ل ڤێ هاڤینێ ئەولەهیا سینۆرێن خوە یێن ب ئیراقێ رە ب تەمامی کۆنترۆل بکن، ئه‌ڤ گۆتنا ئاردۆغان تێ واته‌یا گه‌فا ده‌ستپێكرنا ئۆپه‌راسیۆنه‌كه به‌رفه‌ره‌هـ یا په‌یاده ل هوندرێ باشوورێ كوردستانێ.
هه‌ر وها گۆت: «ئەم دێ ژ هاڤینا ئیسال ڤە ئەولەهیا سینۆرێن خوە یێن ب ئیراقێ رە ب تەمامی کۆنترۆل بکن و تەقەز ئەم دێ خەباتێن خوەیێن کو ل سووریەیێ نەقەدیانە ژی بقەدینن».
ئێریشا موحته‌مه‌ل كیژان هه‌رێمان دكه ئارمانج
پشتره و ب پێنج رۆژان به‌ریا سه‌ردانا ئاردۆگان یا به‌غدایێ، وەزیرێ بەرەڤانیێ یێ ترکییێ رۆژا 17 نیسانا ئیسال ئاماژە ب ئۆپەراسیۆنێن ئارتێشا ترکیەیێ یێن ل دەڤەرێن سینۆری یێن ھەرێما کوردستانێ کر و گۆت: «قەندیل و گارە دێ ئارمانجێن سەرەکی یێن ئۆپەراسیۆنێن مە بن، دێ مە ل وان دەڤەران کارێن گرنگ ھەبن».
داوی ئۆپه‌راسیۆنا تركیێ یا كو ل دژی په‌كه‌كێ ل هوندرێ خاكا باشوورێ كوردستانێ هاتیه ئه‌نجامدایین و هێژان ژی به‌رده‌وام دكه، ئۆپه‌راسیۆنا «په‌نجه كلیتێ» یه كو ل 17 نیسانا سالا 2022ێ ده‌ستپێكربوو ئه‌ڤ ئۆپه‌راسیۆن هه‌رێمێن مەتینا، زاپ و ئاڤاشین-باسیان یێن ل سینۆرێ ناڤچەیا ئامێدیێ ل خوە دگرە.
