کۆمیسیۆنا بلندا سەربخوە یا هلبژارتنان یا ئیراقێ هەموو کارێن خوە یێن ژ بۆ لدارخستنا هلبژارتنێن پارلامەنتۆیا کوردستانێ راوەستاندن.
کۆمیسیۆنا بلندا سەربخوە یا هلبژارتنان یا ئیراقێ ئیرۆ 01-05-2024، هەموو کارێن خوە یێن ژ بۆ لدارخستنا هلبژارتنێن پارلامەنتۆیا کوردستانێ راوەستاندن.
ل گۆری ڤێ هلبژارتنێن پارلامەنتۆیا کوردستانێ د مەها خزیرانا ئیسال دە نایێن کرن، دێ چەند مەهان بێن پاشخستن. سەرۆکێ هەرێما کوردستانێ نێچیرڤان بارزانی دێ هەفتەیا بێ، رۆژەکە دن ژ بۆ هلبژارتنێن خولا شەشەمین یا پارلامەنتۆیا هەرێما کوردستانێ دیار بکە.
راوەستاندنا کارێن کۆمسیۆنا بلندا هلبژارتنانا ئیراقێ، پشتی وێ تێ، پۆلیتبورۆیا په‌ده‌كێ رۆژا دوشەمێ، 18.03.2024، بەیاننامەیەک ل سەر رەوشا نها یا ئیراقێ، پەیوەندیێن هەولێر و بەغدایێ، هلبژارتنێن پەرلەمانا کوردستانێ، بریارێن دادگەها فەدەرالی و چەند پرسێن دن بەلاڤ کر و تێ دە راگەهاند، «ئەم وەکی بەرژەوەندا گەل و وەلاتێ خوە دبینن کو پارتیا مە نەچە بن بارێ پەژراندنا بریارا نەدەستووری و سیستەمەکا سەپاندی ژ دەرڤەیێ ئیرادەیا گەلێ هەرێما کوردستانێ و دەزگەهێن وێ یێن دەستووری و تەڤلی وان هلبژارتنان نەبە کو ب ئاوایەکی نەقانوونی و نەدەستووری و ل ژێر سیبەرا سیستەمەکا سەپاندی بێن کرن».
ئەڤ هەلوەستا په‌ده‌كێ ژی پشتی بریارا دادگەها فەدەرالی یا ئیراقێ هات کو ل رۆژا 21ێ سباتا 2024ێ و پشتی کو 11 جاران روونشتنا خوە ل سەر قانوونا هلبژارتنێن پەرلەمانا کوردستانێ پاش خست بریار دا، ژ بۆ گەرا شەشێ یا هلبژارتنێن پەرلەمانا کوردستانێ؛ هەرێما کوردستانێ ل سەر چار بازنێن پرۆسەیا هلبژارتنان هات پارڤەکرن و هەژمارا کورسیێن کوتایان کو 11 کورسی بوون هەلوەشاندن، ب ڤی رەنگی هەژمارا کورسیێن پەرلەمانا کوردستانێ ژ 111 کورسیان بۆ 100 کورسیان هات کێمکرن.
ژ بلی ڤان بریاران ژی، تەڤایا پارتی و ئالیێن سیاسییێن هەر دو پێکهاتێن کرستیان و ترکمەنان (ژ بلی بەرەیێ ترکمەنی)، بریار دا کو هلبژارتنێن گەرا شەشێ یا پەرلەمانتۆیا کوردستانێ بۆیکۆت بکن.
