ل گۆری ئامارێن رێخستنا مافێ مرۆڤان «هەنگاو»، تەنێ د مەها نیسانا بۆری دە 37 کۆلبەرێن رۆژهلاتێ کوردستانێ ل ناڤچەیێن سینۆری بوونە قوربانی کو پرانیا وان ب گوللـەیێن راستەراست یێن هێزێن ئیرانێ هاتبوون ئارمانجکرن.
ل گۆری هەنگاوێ، د مەها بۆری دە 4 کۆلبەر هاتن کوشتن و 33 کۆلبەرێن دن ژی بریندار بوونە، ژ وان 2 کۆلبەرێن 16 سالی و یەک ژی 17 سالی بوون.
د راپۆرێ دە هات گۆتن: «مەهرداد عەبدوللازادە ژ سەردەشتێ، ئۆمێد سەعیدی ژ سنەیێ، سەیوان دەست ئافکەن ژ مەریوانێ و شوانە ئەحمەدپوور ژ بانێ د مەها نیسانێ دە ژ ئالیێ هێزێن چەکدارێن ئیرانێ ڤە هاتن کوشتن».
ئاماژە ب وێ هاتە کرن، قوربانی هەری زێدە ل دەڤەرێن سینۆری یێن پارێزگەها سنە یا رۆژهلاتێ کوردستانێ هاتنە تۆمارکرن، کو 20 کەس لێ بوونە قوربانی.
ل گۆری راپۆرێ، د مەها ئادارا ئیسال دە ژی، 54 کۆلبەر ل ناڤچەیێن سینۆری یێن باشوور و رۆژهلاتێ کوردستانێ ژ ئالیێ هێزێن ئیرانێ ڤە هاتنە کوشتن یان بریندارکرن.
هەژمارەک ژ خەلکێ رۆژهلاتێ کوردستانێ، ژ بۆ دابینکرنا دەبارا ژیانا خوە، ب رێیێن دژوار و چیایی، تێنە سەر سینۆرێن هەرێما کوردستانێ و کارێ ڤەگوهەستنا کەلووپەلان دکن، لێ بەلێ سالانە هەژمارەک ژ وان ب گولەیێن هێزێن سوپایا پاسداران یا ئیرانێ تێن کوشتن و بریندارکرن.
