تاسفیه‌كرنا ئه‌ندامێن نه‌رازی یێن په‌كه‌كێ د ناڤا رێخستنێ ده ده‌وام دكه، هه‌ری داوی كۆمیته‌یا رێخستنێ فه‌رمانا ته‌رۆركرنا ئه‌ندامه‌كی خوه یێ ل شه‌نگالێ دا و جه‌لادێن كۆمیتێ ب بۆكسا ئاسنی سه‌رێ ڤی ئه‌ندامی بژكاندن.
چاڤكانیێن داركا مازی ل شه‌نگالێ ئاشكه‌ره كرن، هه‌ژماره‌كه چه‌كدارێن په‌كه‌كێ ل شه‌نگالێ ل رۆژا 14 ئادارا ئیسال 2024ێ د هه‌ولا تاسفیه‌كرنا ئه‌ندامه‌كی رێخستنێ یێ ب ناڤێ «میار ئه‌حمه‌د شمێل» ئیشكه‌نجه‌یه‌كه هۆڤ بكارئانینه و ب بۆكسا ئاسنی ل وی خستینه.
ده‌ستنشان كر، وان چه‌كدارێن په‌كه‌كێ، ده‌ربێن گران ل ئه‌ندامێ په‌كه‌كێ میار دا نه و ب بۆكسا ئاسنی سه‌رێ وی بژكاندینه.
هه‌ر وها ئاماژه كرن كو ژ به‌ر گرانیا برینێن وی، كو ئه‌و ده‌ربێن ب بۆكسا ئاسنی ب سه‌رێ وی كه‌تبوون و خوینبه‌ربوون بۆ چێببوو، رۆژا 15 ئادارێ میار ژ نه‌خوه‌شخانه‌یا ناڤه‌ندی یا سنوونێ بۆ نه‌خوشه‌خانه‌یا ئیبن سینا یا ل باژارێ مووسلێ هاتیه راكرن و هێژان ل وره.
چاڤكانیێن مه هه‌ر وها گۆتن كو نه‌خوه‌شخانه‌یا ناڤه‌ندی یا سنوونێ د تۆمارا خوه یا رۆژانه ده ئه‌ڤ بوویه‌ر تۆمار کرییە.
ل گۆری ئاگاهیێن ده‌ستێ مه دە، ئه‌ندامێ په‌كه‌كێ یێ ب ناڤێ میار ئه‌حمه‌د، ته‌علیماتێن رێڤه‌به‌رییا په‌كه‌كێ ره‌دكربوون و پشتی کو هه‌ول دایی برەڤە وه‌لاتێ سووریێ كه‌ت به‌ر حه‌سابا تاسفیه‌كرنێ.
