پارتیا وەلاتپارێزێن کوردستانێ: دەستپێکا جینۆسایدا دێرسمێ 4ێ گولانا 1937ێیە!
پارتیا وەلاتپارێزێن کوردستانێ (PWK)ێ دەربارێ دەستپێکا قرکرن و جینۆساید و کۆمکوژیا دێرسیمێ دە کو بریارا وێ رۆژا 4ێ گولانا 1937 ھاتبوو دایین داخویانیەک بەلاڤ کر.
داخویانیا پارتیا وەلاتپارێزێن کوردستانێ وھایە:
87 سالان بەرێ، رۆژا 4ێ گولانێ بریارا ئێریشا لەشکەری یا قرکرنا ملەتەکی کو ژ ئالییێ م. ک. ئاتاتورک و فەوزی چاکماک ڤە ھاتبوو پەژراندن، ھاتە داین. ل سەر ‘بریارا ھەیەتا وەزارەتێ یا تەڤگەرا تەنقیلی یا دێرسمێ’ کو د 4ێ گولانا 1937 دە ھاتبوو ستەندن، د 12 گولانا 1937 دە ھێزێن لەشکەری یێن کۆمارا ترکییێ دێرسم داگیر کر و کەڤر ل سەر کەڤری نەھشتن.
د ڤێ بریارنامەیێ دە تێ گۆتن کو ‘دێ گەلێ ھەرێمێ هێت کۆمکرن و نەقلی دەڤەرەک دن بێ کرن. ئەڤ ئۆپەراسیۆنا کۆمکرنێ دێ بگرە سەر گوندان، ھەم چەک و سیلەحان کۆم بکە و ھەم ژی کەسێن ھاتنە کۆمکرن نەقلی دەڤەرێن دن بکە’.
دیسا د بریارنامەیێ دە تێ گۆتن کو ‘ھەگەر ئەم تەنێ ب ئێریشێ قیما خوە بینن دێ تفک و چاڤکانییێن سەرھلدانێ د شوونا خوە دە بمینن. لۆما ژی دڤێت ئەم ئەو کەسێن کو چەک ب کار ئانینە و تینن، د جیھ دە و ژ بنی دە ژ ھۆلێ راکن، گوندان ب تەڤاھی وێران بکن و مالباتێن وان دوور بخینن’.
بێگومان، ئەڤ بریارنامە ژ بەر باوەری و ناسمەیا وێ، بریار و ئەمرێ ژھۆلێ راکرنا ملەتەکی بوو. دەولەتا ترکییێ ب ناڤێ ھلدانا ژ بۆ لەشکەرییێ بەشەکی مەزن ژ خەلکێ ھەرێمێ کر لەشکەر؛ کەسێن کو دکاریبوون رێبەرییا گەل بکن و د ناڤ خەلکێ دە خوەدی روومەت بوون ژی کۆم کرن و ژ بۆ پێوەندییێن وان ب ھەڤدوو نەمینن، ئەو نەقلی باژارێن جوودایێن ترکییێ کرن و ئەو مەحکوومی ‘ئیقامەتا ناچاری’ کرن. پشتی وێ ژی ئۆپەراسیۆنا قرکرنێ دەست پێ کر و بێ کو فەرقەکێ د ناڤ بەرا وان دە بکن، گەلێ دێرسمێ قر کر.
سەرۆکێ ئاساییشا مالاتیایێ یێ وێ دەمێ ئیحسان سەبری چاگلایانگیل د بیرئانینێن خوە دە دانپێدانێ دکە کو ژن و زارۆکێن کو ژ زلمێ فلتیبوون و رەڤییابوون شکەفتان، د وان شکەفتان دە ب “ژەھرا مشکان” ھاتن قەتلکرن. ژن و کەچێن دێرسمێ ژ بۆ نەکەڤن دەستێن لەشکەران خوە ژ زنارێن بلند دهاڤێتن چەمێ مونزوورێ. لەشکەران ھندەک زارۆکێن سێوی ژی دبرن باژارێن خوە و ئەو وەکە ملەتەکی دن دگیھاندن.
جینۆسایدا دێرسمێ، خەلەکەک ژ سییاسەتا ژ ھۆلێ راکرنا ملەتێ کوردە. ئەڤ پێڤاژۆ سالا 1921 ب شکاندنا بەرخوەدانا کۆچگیرییێ دەست پێ کر و د 1937-1938 دە ب قرکرنا گەلێ دێرسمێ بەردەوام کر. وەکە کو د بریارنامەیێ دە ھاتییە گۆتن، ھەموو جیھ و وارێن بەرخوەدانا گەلێ کوردستانێ یەک ب یەک ھاتن ژناڤبرن.
ژ بەر قرکرن و سووجێن کو ل ھەمبەر گەلێ دێرسمێ و کوردستانێ کرییە، دڤێت دەولەتا ترکییێ داخوازا لێبوورێنێ بکە و ل گۆری ڤێ راستێیێ گاڤێن پێویست باڤێژە. وەکە گاڤا پێشی، دەولەتا ترکییێ دکارە ب ئەشکەرەکرنا قەبرێن سەرۆک و رێبەرێن تەڤگەرێن کوردان سەید رزا، شێخ سەعید و یێن دن و سەیدێ نوورسی کو ھەتا نها ب دزی گرتییە، دەست پێ بکە.
د 87ەمین سالڤەگەرا دەستپێکا جینۆسایدا دێرسمێ دە، ئەم جینۆسایدا دێرسمێ و ھەموو قرکرن و جینۆسایدێن ل ھەمبەری گەلێ کوردستانێ پێک ھاتنە پرۆتەستۆ دکن و روورەش دکن. ئەم ھەموو شەھید و پاکرەوانێن کوردستانێ ب رێزداری ب بیر تینن. خەبات و تێکۆشینا وان دێ ریا خەبات و تێکۆشینا ملەتێ کورد یا ژ بۆ سەرخوەبوون، ئازادی و دەمۆکراسییێ رۆھنی بکە.
4/5/2024
نڤێسینگەها راگھاندنێ یا پارتییا وەلاتپارێزێن کوردستانێ (PW)
