ب ئارمانجا شەرێ ل دژی ھێزێن سووریەیا دەمۆکراتیک (ھەسەدێ) گرۆپەکێ چەکداری یێ نوو ژ ئالیێ عەشیران ل ھەرێمێن د بن کۆنترۆلا ھێزێن رەژیمێ و ملیسێن ئیرانێ دە ل رۆژھلاتێ دێرازۆرێ ھات پێکانین.
رەوانگەھا سووری یا ژ بۆ مافێن مرۆڤان بەلاڤ کر، عەشیرا “ئەل-بو شەبان” ب ئامادەبوونا ھەژمارەک ژ شێخێن عەشیرێن ئەل-عەگێدات و بەگارا، پێکانینا گرۆپەکێ چەکداری یێ ب ناڤێ “سەرایا ئەل-بو شەبان” ب سەرۆکاتیا شێخ عەلا ئەل-لەبباد راگھاند.
ھات راگھاندن، ئەڤ گرۆپا نوو تەڤلی “ئارتێشا عەشیران” یا ب سەرۆکاتیا شێخێ عەشیرا ئەل-عگێدات ئیبراھیم ئەل-ھەفل دبە، ب ئارمانجا پێکانینا ئۆپەراسیۆنێن چەکداری ل دژی جھ و خالێن ھێزێن سووریەیا دەمۆکراتیک.
ل گۆری ئاگاھیان، شێخ عەلا ئەل-لەبباد د جڤینا کو ل باژارێ دێرازۆرێ ھاتیە لدارخستن دە، راگھاند کو ئەڤ ھەڤپەیمانی، ھەڤپەیمانیا ھەڤگرتن و ھەڤکاریا عەشیرانە.
ئەڤ جڤین، کو نەیا یەکەمینە، پێشتر ژی ھندەک عەشیرێن سەر ب ھێزێن رێژیمێ ڤە ل ناڤچەیێن د بن کۆنترۆلا وێ دە، ب فەرمانا ملیسێن سەر ب ئیرانێ ڤە جڤیابوون ژ بۆ پێکانینا پێکھاتەیەکا چەکداری، ژ بۆ شەرێ ل دژی ھەسەدێ و ھەڤپەیمانیا ناڤدەولەتی ل رۆژھلاتێ فراتێ.
رەوانگەھا سووری بەری چەند رۆژان بەلاڤ کربوو کو ئەفسەرەک ژ ئۆفیسا کارووبارێن عەشیران کو ژ کۆشکا جمھوری یا سەرۆکێ سووریێ د داویا مەھا نیسانێ دە، ل باژارۆکێ ئەل-عشارەیا سەر ب دێرازۆرێ ڤە لگەل شێخێ عەشیرا ئەل-عەگێدات ئیبراھم ئەل-ھەفل جڤیابوو، تا کو ئێریشێن ل دژی ھەرێمێن ھەسەدێ پێک بینن.
زێدەتر ژ ھەشت مەھانە ل دەڤەرێن رۆژھلاتێ دێرازۆرێ یێن د بن کۆنترۆلا ھەسەدێ دە، ئێریشێن چەکدارێن خوەجھی ل دژی ھەسەدێ زێدە بوونە. ل گۆری زانیاریێن رەوانگەھا سووری، ئەڤ ئێریش د فەرمان و پشتگریا حزبولاھا لوبنانی و ملیسێن سەر ب ئیرانێ ڤە تێن کرن.
ژ داویا مەھا تەباخا 2023 ڤە، پشتی گرتنا فەرماندارێ ئەنجوومەنا لەشکەری یا دێرازۆرێ ئەحمەد ئەل خەبیل “ئەبوو خەولا” ژ ئالیێ ھەسەدێ ڤە، ئالۆزی و پەڤچوون ل رۆژھلاتێ دێرازۆرێ د ناڤبەرا ھەسەدێ و چەکدارێن خوەجھی دە دەردکەڤن.
ھەسەدێ پێشتر ژی د داخویانیەکێ دە راگھاندبوو، “کەسێ ب ناڤێ ئیبراھیم ئەل-ھەفل، سەرۆکێ فتنەیێ یە و ئێدی ژ ئالیێ ھێزێن وان ڤە تێ خوەستن، ژ بەر کو ئەو بوویە سەدەما رژاندنا خوینا شەرڤان و خەلکێ و ل گۆری فەرمانێن ئالیێن دەرڤە، سەرکێشیا ھەولدانێن دەرخستنا فتنەیێ دکە.”
