هەڤسەرۆکا گشتی یا پارتیا دەم تولای حاتەم ئۆغۆللاری د سالڤەگەرا کۆمکوژیا دێرسمێ دە ئاخڤی و دیار کر کو ئه‌ڤ كۆمكوژی نه یا كوردانه.
دوهـ رۆژا شه‌می 4/5/2024ێ ل دێرسمێ یا باكورێ كوردستانێ، ب بۆنەیا سالڤەگەرا کۆمکوژیا دێرسمێ بیرانینەک هات لدارخستن، هەڤسەرۆکا گشتی یا پارتیا دەم تولای حاتەم ئۆغۆللاری ته‌ڤلی مه‌راسیمێ بوو و ئاخڤی، وێ گۆت: «كۆمكوژییا دێرسمێ نه یا كوردانه، یا عه‌له‌وی یا نه».
د مه‌راسیما بیرئانینا كۆمكوژییا دێرسمێ ده، پانکارتێن «کۆمکوژیا دێرسمێ نایێ ژ بیرکرن»، «بلا ناڤێ دێرسمێ و ناڤێن هەرێمێن دن یێن دێرسمێ بێن ڤەگەراندن»، «ژ بیر نەکن» و «بلا ئارشیڤ بێن ڤەکرن و راستی دەرکەڤە هۆلێ» هاتن بلند كرن.
هه‌ڤسه‌رۆكا گشتی یا ده‌مێ تولای حاتەم ئۆغۆللاری د ئاخافتنا خوه ده گۆت: «جڤاکا ئەلەوی ت جاری سەرێ خوە ل هەمبەری پۆلیتیکایا ئاسیمیلاسیۆنێ نەتەواندیە، کۆمکوژییا دێرسمێ د دیرۆکا ترکیەیێ دە کۆمکوژیا هەری مەزن یا عەلەویانە».
هه‌ڤسه‌رۆكا ده‌مێ د ته‌ڤ ئاخافتنا خوه ده ب یێك په‌یڤێ ژی په‌یڤا كورد نه‌گۆت و نه‌گوت كو قه‌تلعاما دێرسمێ ب سه‌رێ كوردان هاتیه، ئه‌ڤ ژی ب وێ واته‌یێ تێ كو خه‌تا سه‌ره‌كه یا پارتیا ده‌مێ نه كورد و كوردستانیبوونه، لوما ژی تولای خانێ جه‌ساره‌ت نه‌كر ببێژه یێن كو د ڤێ كۆموژیێ ده هاتنه قڕ كرن كورد بوون.
لێبه‌لێ ژ هێلا خوه ڤه هه‌ڤسه‌رۆكا گشتی یا دەبەپێ کەسکین بایندەر د مه‌راسیمێ ده دیار کر کو گەلێ کورد وێ هەر تم ل دژی ڤێ قرکرنێ تێبکۆشن.
کەسکین بایندەر گۆت، «سەیید رزا و رێهەڤالێن وی 100 سال بەرێ سەرێ خوە نەتەواند. ئەم دزانن کو گەلێ دێرسمێ وێ ئیرۆ ل هەمبەری زلم و قرکرنێ بێدەنگ نەمینە».
87 سالان بەرێ، رۆژا 4ێ گولانێ بریارا ئێریشا لەشکەری یا قرکرنا مللەتەکی کو ژ ئالییێ مسته‌فا كه‌مال. ئاتاتورک و فەوزی چاکماک ڤە ھاتبوو پەژراندن، ھاتە داین. بریارا ئێریشێ د 4ێ گولانا 1937 دە ھاتبوو ستەندن، د 12 گولانا 1937 دە ھێزێن لەشکەری یێن کۆمارا ترکییێ دێرسم داگیر کر و کەڤر ل سەر کەڤری نەھشتن.
جینۆسایدا دێرسمێ، خەلەکەکه ژ سییاسەتا قڕكرنا مللەتێ کوردە. ئەڤ پێڤاژۆ سالا 1921 ب شکاندنا بەرخوەدانا کۆچگیرییێ دەست پێ کر و د 1937-1938 دە ب قرکرنا گەلێ دێرسمێ بەردەوام کر و ھەموو جیھ و وارێن بەرخوەدانا گەلێ کوردستانێ یەک ب یەک تێ ده ھاتن ژناڤبرن.
