ل عاموودێ ژ بۆ سەربەستبەردانا ناسر ژارۆ خوەپێشاندانەک ھات لدارخستن

دوهی یەکشەمێ، پارتیا یەکیتییا کوردستان-سووریێ ل باژارێ عاموودێ ل سەر داخوازا رێخستنا پارتیێ ل باژارێ عاموودێ، ب بەشداریا ئەندامێن سەرکرداتیا پارتیێ خوەپێشاندانەک ژ بۆ داخوازکرنا ئازادیا ئەندامێ رێخستنێ یێ کو ژ ئالیێ چەکدارێن پەیەدێ ڤە ھاتیە رەڤاندن ل دار خست.

بەشدارێن چالاکیێ پانکارتێن ب نڤیسا خوە:

جیهێ چالاکڤانان نە د گرتیگەھان دە یە.

ژ گرتن و قرکرنێ رە نا.

بابێ من ل کویە، بابێ من بەردن.

ئازادی ژ بۆ گرتیێن سیاسی یێن د گرتیگەھێن پەیەدێ دە.

ئەم داخواز دکن کو چارەنووسا ھەموو گرتیێن سیاسی وەرە ئەشکەرەکرن.

ژ ناسر ژارۆ رە ئازادی.

نا ژ گرتنا کەیفی رە… نا ژ رەڤاندنێ رە.

ھەر وھا بەشداران ئالایێن کوردستانێ و وێنەیێن گرتی ناسر ژارۆ بلند کرن.

ئەنداما دەستەیا سیاسی یا پارتیا یەکیتی زەکییا رەسوول د گۆتارەکێ دە د وێ خوەپێشاندانێ دە داخوازا بەردانا ناسر ژاڕۆ و ھەموو گرتیێن سیاسی و راوەستاندنا گرتنا چالاکڤان و سیاسەتمەداران کر.

جیگرێ سەرۆکێ ئەنجوومەنا نشتمانیا کوردی سلێمان ئۆسۆ د داخویانیەکێ دە ل سەر پلاتفۆرما فەیسبۆکێ بانگا بەشداریا ل خوەپێشاندانێ کر و تێ دە گۆت: ئەز بانگ ل جەماوەرێ گەلێ مە ژ ھەموو پێکھاتەیێن جڤاکێ دکم کو ب ئاوایەکی چالاک بەشدار ببن. د خوەپێشاندانێ دە بانگ ل پەیەدێ هات کرن کو چارەنڤیسا ناسر ژارۆ کو بەری زێدەتری 14 رۆژان ژ ئالیێ چەکدارێن پەیەدێ ڤە ھاتبوو رەڤاندن و ھەتا نھا چارەنڤیسا وی نە دیارە، ئەشکەرە بکە.

چەکدارێن پەیەدێ ناسر ژارۆ دەما کو ژ گوندێ خوە ل گوندەوارێ عاموودێ بەر ب ناڤەندا باژێر ڤە دچوو د 21ێ نیسانێ دە رەڤاندن.

ئەمینداریا گشتی یا ئەنجوومەنا نشتمانی یا کوردی داخویانیەک بەلاڤ کر و تێ دە رەڤاندنا ژارۆ شەرمەزار کر و بانگ ل رێخستنێن ناڤدەولەتی و ھەڤپەیمانیا ناڤدەولەتی کر کو فشاران بکن ژ بۆ راوەستاندنا ڤان بنپێکرنان.

تۆرا سووری یا مافێن مرۆڤ ژی د داخویانیەکێ دە ترسا خوە دیار کر کو ژارۆ راستی ئیشکەنجەیێ وەرە.