مەکتەبا سیاسی یا په‌ده‌كێ رۆژا دوشەمێ، 18\03\2024، بەیاننامەیەک ل سەر رەوشا نها یا ئیراقێ، پەیوەندیێن هەولێر و بەغدایێ، هلبژارتنێن پەرلەمانێ کوردستانێ، بریارێن دادگەها فەدەرالی و چەند پرسێن دن بەلاڤ کر و تێ دە راگەهاند، «ئەم وەکی بەرژەوەندا گەل و وەلاتێ خوە دبینن کو پارتیا مە نەچە بن بارێ پەژراندنا بریارا نەدەستووری و سیستەمەکا سەپاندی ژ دەرڤەیێ ئیرادەیا گەلێ هەرێما کوردستانێ و دەزگەهێن وێیێن دەستووری و تەڤلی وان هلبژارتنان نەبە کو ب ئاوایەکی نەقانوونی و نەدەستووری و ل ژێر سیبەرا سیستەمەکا سەپاندی بێن کرن».
ئەڤ هەلوەستا په‌ده‌كێ ژی پشتی بریارا دادگەها فەدەرالی یا ئیراقێ هات کو ل رۆژا 21ێ سباتا 2024ێ و پشتی کو 11 جاران روونشتنا خوە ل سەر قانوونا هلبژارتنێن پەرلەمانێ کوردستانێ پاش خست بریار دا، ژ بۆ گەرا شەشێ یا هلبژارتنێن پەرلەمانێ کوردستانێ؛ هەرێما کوردستانێ ل سەر چار بازنێن پرۆسەیا هلبژارتنان هات پارڤەکرن و هەژمارا کورسیێن کوتایان کو 11 کورسی بوون هەلوەشاندن، ب ڤی رەنگی هەژمارا کورسیێن پەرلەمانێ کوردستانێ ژ 111 کورسیان بۆ 100 کورسیان هات کێمکرن.
