جیگرا وەزیرێ دەرڤە یێ ئامەریکایێ ژ بۆ ئاسایشا سڤیل، دەمۆکراسی و مافێن مرۆڤان ئەزرا زیا سەردانا بەغدا، ھەولێر و لالەشێ کر. بەردەڤکێ وەزارەتا دەرڤەیا ئامەریکایێ ژی، سیاسەتا وەلاتێ خوە دەربارێ پرسا شنگالێ و رێکەفتنا شنگالێ دە ژ کوردستان24 رە شرۆڤە کر.
بەردەڤکێ وەزارەتا دەرڤە یا ئامەریکایێ تەکەزی ل سەر جێبەجێکرنا رێکەفتنا شنگالێ یا سالا 2020 د ناڤبەرا بەغدا و ھەولێرێ دە کر، کو ئارمانجا وێ ھێسانکرنا ڤەگەرا ئێزدیان بۆ وارێ باب و کالێن خوە ل ناڤچەیێن کوردستانی یێن دەرڤەیی ئیدارەیا ھەرێما کوردستانێ یە.
د تەباخا 2014 داعشێ ئێرشەکا ھۆڤانە ل دژی ئێزدیان پێک ئانی. نێزیکی 5 ھەزار کەسان ھاتن کوشتن و نێزیکی 400 ھەزار کەس ژی کۆچبەری ھەرێما کوردستانێ و دەرڤەیی ئیراقێ بوون.
پشتی 10 سالان، پرانیا مەزن – نێزیکی 300 ھەزار کەس – ل کامپێن کۆچبەرێن ناڤخوەیی ل ھەرێما کوردستانێ دمینن، ژ بەر کو پرانیا شنگالێ وێرانە ب کێری نیشتەجیبوونێ نایێ، ژ بلی وێ ژی پرسگرێکێن ئەولەھیێ ژ بەر ھەبوونا ملیسان ھەنە.
جێبەجێکرنا رێکەفتنا شنگالێ، مژارەکا سەرەکی یا جڤینێن ئەزرا زیا ل بەغدا و ھەولێرێ بوو، ژ وان ژی جڤینا رۆژا پێنجشەمبێ یا لگەل سەرۆکوەزیرێ ھەرێما کوردستانێ مەسروور بارزانی.
حکوومەتا ھەرێما کوردستانێ ژ بەر چەند سەدەمان دخوازە رێکەفتن وەرە جێبەجێکرن. یەک ژ سەدەمێن سەرەکی ژی، کێمکرنا فشارێن ئابۆرییە کو حکوومەتا ھەرێما کوردستانێ ژ بەر ھاتنا پەنابەران رووبروو وان بوویە.
وەزارەتا دەرڤە: پێویستە رێکەفتنا شنگالێ وەرە جێبەجێکرن
بەردەڤکێ وەزارەتا دەرڤەیا ئامەریکایێ رۆژا ئینێ 10/5/2024، ژ کوردستان 24ێ رە راگھاند: “د دەھەمین سالڤەگەرا جینۆسایدا داعشێ دە، پێویستە پرسگرێکێن ئێزدیان بێن چارەسەرکرن.”
د داخویانیا وەزارەتا دەرڤەیا ئامەریکایێ دە ھات: “ئەم حکوومەتێن ئیراق و ھەرێما کوردستانێ ھان ددن کو د وارێ جێبەجێکرنا رێکەفتنا شنگالێ دە، پێشخستنا دادپەروەری و لێپرسینا ل ھەمبەر تاوانێن ناڤدەولەتی یێن داعشێ دە، پێشکەتنەکا بەرچاڤ بدەست بخن.”
ھەروھا گۆت: “د سەردانا خوەیا بۆ بەغدا و ھەولێرێ دە، جیگرا وەزیرێ دەرڤە ئەزرا زیا تەکەزی ل سەر پشتەڤانیا ئامەریکایێ بۆ جێبەجێکرنا تەماما رێکەفتنا شنگالێ لگەل حکوومەتا فەدەرالا ئیراقێ و حکوومەتا ھەرێما کوردستانێ کر.”
جیگرا وەزیرێ دەرڤەیا ئامەریکایێ سەرەدانا لالەشێ کر
ئەزرا زیا دوھی ئینێ سەردانا لالەشێ کر و لگەل رێڤەبەرێن پێکھاتەیا ئێزدی جڤیا. ل دەرڤەیی پەرەستگەھا لالەشێ ژ بۆ رۆژنامەڤانان ئاخڤی و بانگ ل حکوومەتا ئیراقێ کر کو پێشکەتنێن بەربچاڤ ژ بۆ تەعیینکرنا سەرۆکێ شارەداریا شنگالێ، دامەزراندنا ھێزەکا پۆلیسێن ناڤخوە و گھاندنا خزمەتگوزاریان بۆ شنگالێ بکە.
ئاماژە ب وێ ژی کر، “ئەم ھەروھا حکوومەتا فەدەرال ھان ددن کو نیگەرانیێن دەربارێ رۆلا میلیشیایان ل دەڤەرێن کو ژ داعشێ ھاتنە رزگارکرن، وەک شنگال، دەشتا نینەوایێ و دەڤەرێن پێکھاتەیێن دن یێن جڤاکا ئیراقێ چارەسەر بکە.”
ھەروھا گۆت: “باندۆرا نەرێنی یا کۆمێن میلیشیا ل سەر ئەولەھی و ئارامیا پێکھاتەیان، رێ ل بەر ڤەگەرا کۆچبەران و گەشەپێدانا ئابۆری یا جڤاکێن ھەرێمی دگرە. لێ چارەسەرکرنا ڤان پرسگرێکان گرینگە ژ بۆ مسۆگەرکرنا ڤەگەرا دلخوازییا ئێزدیان.
