50 سال ل سەر دارڤەکرنا یەکەمین شەھیدا ژن یا تەڤگەرا رزگاریخوازا کوردستانێ لەیلا قاسم و چار ھەڤالێن وێ دەرباس دبن. ئیشکەنجەیا ھۆڤانەیا جەلادێن بەعسێ، نەکاری لەیلایێ ژ ھەلوەستا وێ یا نەتەوی و نشتمانی پۆشمان بکە و ب سروودا ئەی رەقیب چوو بەر سێدارێ.
لەیلا قاسم حەسەن سالا 1952 ل گوندێ بامیلێ یێ سەر ب باژارێ خانەقینێ ڤە د مالباتەکا کوردپەروەرا ھەژار ژدایک بوو و سالا 1958 چوو بەر خوەندنێ و قۆناغا سەرەتایی و ناڤەندی ل خانەقینێ بداوی کر.
لەیلا قاسم د سالا 1971 دە بەشا جڤاکناسیێ ل کۆلیژا وێژەیی یا زانکۆیا بەغدایێ خوەند و د ھەمان سالێ دە ژی د یەکیتیا خوەندەکارێن کوردستانێ دە ل بەغدایێ دەست ب خەباتێ کر.
زولم و زۆرا رێژیما بەعسا ئیراقێ ل سەر گەلێ کورد، بیر و ھزرا ئازادیخوازی و تێکۆشینێ ژ بۆ بدەستانینا مافێ نەتەوییێ گەلێ کورد د دلێ لەیلا قاسم دە دروست کر.
د ئادارا 1974 دە و پشتی دەستپێکرنا ئێریشێن حکوومەتا ئیراقێ ل سەر کوردستانێ، لەیلا قاسم و 4 ھەڤالێن خوە ل بەغدایێ ھاتن گرتن.
لەیلا قاسم نموونەیا کەچا کورد یا چەلەنگ و چاڤنەترس بوو، ئەشکەنجە و ئازارا ھۆڤانەیا جەلادێن بەعس نەکارین لەیلایێ ژ ھەلوەستێن وێ یێن نەتەوی ڤەگەرینە.
لەیلا قاسم ب جلێ کوردی و خوەندنا سروودا نەتەوی ئەی رەقیب دچە بەر سێدارێ. لەیلا د داوی چرکەیێن ژیانا خوە دە ژ جەلادێن بەعس رە دبێژە: “پشتی بدارڤەکرنا من، ب ھەزاران کورد ھشیار دبن. گەلەک خوەشحال و سەربلندم کو گیانێ من فیدایی رێیا رزگاریا کوردستانێ دکم.”
لەیلا قاسم دبێژە: “ب ڤی چلێ کوردی ڤە، ئەز دبم بووکا کوردستانێ.”
رۆژا 12 گولانا 1974 لەیلا قاسم و 4 ھەڤالێن خوە جەواد ھەمەوەندی، نەریمان فووئاد، حەسەن حەمەرەشید و ئازاد سلێمان تێن بدارڤەکرن.
ئەو کەسێن کو پشتی مرنا وان، ژیانا وان یا راستەقینە دەستپێ دکە کێمن، چاڤنەترسی و چیرۆکا ژیان و ھەلوەستێن نەتەوی یێن لەیلا قاسم، بوو سەدەما گەشبوونا ھەلوەستا نەتەوی ل جەم ب ھەزاران جوانێن کورد.
چاڤنەترسیا لەیلا قاسم و ھەلوەستێن وێ ل بەردەم دارێ بدارڤەکرنێ، دەنگەکی بلند ل پشت خوە ئانی و ب ھەزاران کەچێن کورد ل چار پەرچەیێن کوردستانێ ب ناڤێ لەیلا ھاتن بناڤکرن.
لەیلا قاسم بوو ناڤەکی دیار د ناڤا چیرۆک، داستان و ھەلبەستێن نڤیسکارێن کورد دە.
