ئەنجوومەنا نشتمانییا کوردی ل سووریەیێ (ئەنەکەسە) رادگھینە، چەکدارێن سەر ب پەیەدێ ڤە 4 ئەندامێن کۆما خوناڤێ یا فۆلکلۆری رەڤاندنە و بانگ ل سازیێن سڤیل و وەلاتێن ھەڤپەیمانیا ناڤدەولەتی دکە کو فشارێ ل پەیەدێ بکن، تا کو دەست ژ ڤان کریار و بنپێکرنان بەردە.
سەکرەتەریا ئەنەکەسێ د داخویانیەکێ دە راگھاند، چەکدارێن سەر ب پەیەدیێ ڤە د پێنگاڤەکا نوو دە 4 ئەندامێن کۆما خوناڤێ یا فۆلکلۆری رەڤاندن:
-مەجدەل دەھام حاج قاسم، بەرپرسێ کۆما خوناڤێ یا فۆلکلۆری یا ل باژارێ عاموودێ دەما کو ڤەدگەریا گوندێ خوەیێ کرنکۆیێ.
-سەید کاوا کۆنرەش (18 سالی)، ئەندامێ کۆما خوناڤێ، دەما کو ژ دبستانێ ڤەدگەریا.
-سالح جەمیل بەکاری (17 سالی)، ئەندامێ کۆما خوناڤێ دەما کو ژ دبستانێ ڤەدگەریا.
-شانۆگەرێ کۆما خوناڤێ ناسر غالب جارۆ ژی ل رۆژا 21 نیسانا بۆری رەڤاندیە.
ئەنەکەسێ د داخویانیا خوە دە ئاماژە ب وێ ژی کر، 4 ئەندامێن ئەنەکەسێ ژی ژ زێدەتری 2 مەھان ڤە ژ ئالیێ چەکدارێن سەر ب پەیەدێ ڤە رەڤاندی نە و ھەتا نھا چارەنڤیسا وان نە دیارە.
ئەنەکەسێ ب توندی کامپاینا گرتن و ترساندنێ یا ل دژی ئەندام و چاڤدێرێن کۆمێن فۆلکلۆرا کوردی شەرمەزار دکە و دبێژە: “ئەڤ کامپاینا رەڤاندنێ ب ئارمانجا ترساندنا وان و نەھشتنا وان ژ پێکانینا چالاکیێن خوەیێن ھونەری و چاندی، ژ بۆ پاراستنا چاند و فۆلکلۆرا گەلێ مە، ھاتیە کرن.”
ھەروەسا ئەنەکەسە دیار دکە: “ئەڤ بنپێکرن د دەمەکێ دە تێن، گەلێ مە دەنگێ خوە بلند دکە و بانگ ل ئالیێن سیاسی یێن کوردی دکە کو ژ بۆ رووبرووبوونا مەترسیێن ل سەر ھەرێمێ یەکھەلوەست بن.” گۆت ژی: “بەردەوامیا ڤان بنپێکرنان تەنێ خزمەتا دژمنێن گەلێ کورد دکە و ئارمانج ژێ ئەوە کو رێ ل بەر ھەموو ھەولدانێن یەکرێزی و یەکھەلوەستیێ بێ گرتن.”
ئەنەکەسێ داخواز کر کەسێن کو ژ کۆما خوناڤێ یا فۆلکلۆری و ھەموو گرتیێن ئەنجوومەنا نشتمانییا کوردی دەملدەست بێن بەردان.
د داویێ داخویانیێ دە ژی بانگ ل سازیێن قانوونی و مرۆڤی و ھەموو وەلاتێن ھەڤپەیمانیا ناڤدەولەتی کر کو ب ئاوایەکی جدی گڤاشتنێ ل ھەسەدێ بکن، تا کو ڤان بنپێکرنێن چەکدارێن پەیەدێ یێن ل ھەمبەر خەلکێ راوەستینە.
