ئەنجوومەنا نشتمانی یا کورد ل سووریێ (ئەنەکەسێ) بەلاڤ کر، “کۆمێن چەکدارێن سەر ب پەیەدێ ڤە ئۆفیسا پەدەکە-سێ ل قامشلۆ شەوتاند” و بانگ ل ھەڤپەیمانیا ناڤدەولەتی کر ژی کو ڤان کریاران شەرمەزار بکە و کار ژ بۆ راوەستاندنا وان بکە.
سەکرەتەریا ئەنەکەسێ د داخویانیەکێ دە راگھاند، “کۆمێن چەکدارێن سەر ب پارتیا یەکیتیا دەمۆکرات (پەیەدێ) ڤە، ئیرۆ 14 گولانێ، ئۆفیسا پارتیا دەمۆکراتا کوردستانێ – سووریێ (پەدەکە-سێ)، ل باژارێ قامشلۆ، شەوتاند.”
ئەنەکەسە دیار دکە، “ب شەوتاندنا ڤێ ئۆفیسێ رە، ھەژمارا ئۆفیسێن کو ژ 1 ئادارێ ڤە ھاتنە شەوتاندن، گھیشتیە دەھ ئۆفیسێن ئەنەکەسێ و پارتیێن وێ ل سەرانسەری باژار و باژارۆکێن کوردی یێن د بن کۆنترۆلا پەیەدێ دە.”
ئەنەکەسە دبێژە، “ژ ھەر کەسی رە ئەشکەرە بوویە کو ئارمانجا ڤان کریاران ئەوە کو رێ ل بەر ھەولدانێن ئامەریکا و ئەورۆپایێ یێن ژ بۆ ڤەگەراندنا دیالۆگا کوردی-کوردی بگرن، کو ب سپۆنسەریا ئامەریکا و گارانتۆریا سەرکردایەتیا ھەسەدێ د نیسانا 2020 دە دەست پێ کربوو و ژ ئالیێ پەیەدێ ڤە ھاتبوو تێکبرن.”
د داخویانیێ دە ھات ژی، “ئەنەکەسە ب توندی ڤان کریارێن تەرۆریستی یێن کو ژ ئالیێ کۆمێن چەکدارێن سەر ب پەیەدێ ڤە تێن کرن، شەرمەزار دکە و بەرپرسێن وێ یێن سیاسی، ئەولەکاری و لەشکەری د بەر ڤان کریاران دە بەرپرسیار دبینە.”
ئەنەکەسێ بانگ ل ھەڤپەیمانیا ناڤدەولەتی کر کو ڤان “کریارێن تەرۆریستی” شەرمەزار بکە و کار ژ بۆ راوەستاندنا وان بکە. ھەروھا بانگ ل ھەموو پارتیێن کوردستانی کر ژی کو ھەلوەستەکە زەلال ل سەر ڤان کریارێن ل دژی ئەنەکەسێ نیشان بدن، وان شەرمەزار بکن و کار ژ بۆ راوەستاندنا وان بکن.
