گەنەرالەکی هێزێن هەڤپەیمانان بەری کو ژ کوردستانێ دەربکەڤە دبێژە، «ئەز دێ ل سەر پشتەڤانیا پێشمەرگەیان بەردەوام بم».
ل دووڤ راگەهاندنا وەزارەتا پێشمەرگە، وەزیرێ پێشمەرگە یێ حکوومەتا هەرێما کوردستانێ دوهی سێشەمیێ 14\05\2024 ب بەرپرسێ بلندێ شێورمەندێن سەربازی یێن هەڤپەیمانان گەنەرال ئەجکەر و جیگرێ بەرپرسێ بلندێ شێورمەندێن سەربازی یێن هەڤپەیمانان گەنەرال هام رە جڤیا.
ل دووڤ وێ راگەهاندنێ، وەزیرێ پێشمەرگە د وێ جڤینێ دە نیگەرانیا خوە نیشان دایە کو ئەرکێ بەرپرسێ بلندێ شێورمەندێن سەربازییێن هەڤپەیمانان گەنەرال ئەجکەر ل ئیراقێ بداوی تێ.
وەزیرێ پێشمەرگە هەروەسا گۆت، «ئەجکەر دۆست و ئالیکارەکی بنرخێ وەزارەتا پێشمەرگە و پرۆسەیا چاکسازیێ بوو».
راگەهاندنا وەزارەتا پێشمەرگە ئاماژە ژی دایە، «د وێ جڤینێ دە دانووستاندن ل سەر مژارا تەڤئالی یا گرێدایی پرۆسەیا چاکسازیێ یا وەزارەتا پێشمەرگە و گرنگیا ئالیکاریێن هەڤپەیمانان ژ بۆ هێزا پێشمەرگەیان و ئارتێش و هێزێن ئەولەهیێ یێن ئیراقێ هاتنە کرن».
ل دووڤ زانیارێن وەزارەتا پێشمەرگە، بریارە گەنەرال هام ل پاشەرۆژەکە نێزیک وەکی جیگرێ گەنەرال ئەجکەر ل هەرێما کوردستانێ دەست ب کاری بکە.
