زمانێ کوردی ژ بۆ هەبوون و ژیان و بەردەوامی و ڤەژینا مللەتێ کورد هەیکەلەکی ئەساسییە، بنگەها مللەتبوونێ یە.
پارتیا وەلاتپارێزێن کوردستانێ PWK ژ بۆ رۆژا زمانێ کوردی داخویانیەک پارڤە کر و وها گۆت: هەلبەتە کو ئیرۆ خەباتا ژ بۆ بدەستخستنا مافێ پەروەردەیا ب زمانێ کوردی پێویستییه‌ك ئەساسی یا نەتەوی، نشتمانی یە. تێکۆشین و خەباتا بدەستخستنا مافێ پەروەردەیا ب زمانێ کوردی و فەرمیبوونا زمانێ کوردی، ب هشمەندیا بدەستخستنا ستاتوویەکە نەتەوەیی، جۆگرافیک، سیاسی یا ل کوردستانێ، ب ئارمانجا بدەستخستنا مافێ چارەنووسیا مللەتێ کورد ڤە دڤێ بێ مەشاندن.
لێ ئیرۆ ل باکورێ کوردستانێ ژ بۆ لێخوەدیدەرکەتن و پێشدەبرنا زمانێ کوردی، کی ب چ ئاوایی ژی بە، چ گاڤان باڤێژە دڤێ ئەم پشتگر و ئالیکارێ وان بن. دڤێ ئەم ل هەموو خەبات و دەزگەهـ و هەول و گاڤێن ژ بۆ زمانێ کوردی خوەدی دەرکەڤن.
ئیرۆ ل باکورێ کوردستانێ زمانێ کوردی د بن زەخت و نەحەقی و خەتەریەکە مەزن دایە.
ئەڤە 100 سالە دەولەتا ترکیەیێ ب سیاسەتا ئینکار و ئاسیمیلاسیۆنێ خوەستیە زمانێ کوردی (کورمانجی و کردکی/زازاکی) تونە بکە. هەلبەتە کو ڤێ سیاسەتا شۆڤەنی تەسیرەکە خەراب ل سەر جڤاتا کوردا ل باکورێ کوردستانێ کریە. لێ تو سیاسەت و کریارێن دەولەتا ترکیەیێ نکاریبوویە مللەتێ کورد و زمانێ وی ژ هۆلێ راکە. ئیرۆ هەبوونا مللەتێ کورد، هەبوونا زمانێ کوردی، بەرهەما تێکۆشین و بەرخوەدان و لێخوەدیدەرکەتنەکە بێهەمپایە.
ئیرۆ لێخوەدیدەرکەتنا زمانێ کوردی، ژ ناڤ مالێ ب خوە دەستپێ دبە. دڤێ هەموو کورد د ناڤ مالا خوە دا ب کوردی (کورمانجی و کرمانجکی/زازاکی) باخڤن. دڤێ ئەڤ وازیفەیا مە یا ئەولا نەتەوی و ئینسانی بە. دبستانا ئەولا زارۆکێن کوردان ناڤ مالا وانە. دایک و باڤ و مالباتێن کورد، دڤێ ئاخافتن و فێربوون و فێرکرنا زمانێ کوردی وەکە وازیفەیا خوە یا ویژدانی، ئینسانی و نەتەوی یا ئەساسی بزانبن.
دڤێ ئەم د ژیانا خوە یا رۆژانە دا، ل کارێ خوە، ل بازارێ زمانێ کوردی وەکە زمانێ ئەول ب کار بینن.
هەلبەتە کو ژ بەر راستیا ملەتێ مە، ئەم مەجبوورن کو ل گەل زمانێ کوردی، زمانێ ترکی ژی د خەباتا خوە یا سیاسی دە ب کار بینن. لێ دڤێ هەموو پارتیێن کورد و کوردستانی د هەموو خەبات و دان و ستاندنێن خوە یێن ناڤخوەیی دە، د خەباتێن خوە یێن جڤاکی، سیاسی دە زمانێ کوردی وەک زمانێ ئەساسی ب کار بینن. هەموو ئەندامێن پارتیێن کورد و کوردستانی دڤێ زمانێ خوە یێ زکماکی بزانبن، فێربن، ب کار بینن.
دڤێ دەزگەهێن سڤیل، سیاسەتڤان، رەوشەنبیر، هونەرمەند، زانایێن ئۆلی، هەموو کەسایەتێن ژ بەشێن جودا یێن جڤاتێ فێربوون و بکارئانین و لێخوەدیدەرکەتن و پێشدەبرنا زمانێ کوردی وەک وازیفەیەکە ئینسانی و نەتەوی بزانبن.
دڤێ ئەم وەک کورد، ژ بۆ کو زمانێ کوردی ببە زمانێ پەروەردەیێ، ببە زمانێ فەرمی دەست بدن هەڤ و دڤێ دەولەتا ترکیەیێ ڤی مافێ مەشرووع، نەتەوەیی، ئینسانی د قانوونا بنگەهین و د هەموو یاسایێن خوە دە قەبوول بکە.
زمانێ مە هەبوونا مەیە. ب ڤێ هشمەندیێ دڤێ ئەم ل هەبوونا خوە خوەدی دەرکەڤن. دڤێ 365 رۆژێن سالێ ژ بۆ مە رۆژا زمانێ کوردی بە.
