ل کانی ماسێ یا ناڤچەیا ئامێدیێ ژ بەر شەر و پەڤچوونێن د ناڤبەرا هێزێن چەکدارێن ترکیەیێ و په‌كه‌كێ دە گەلەک دارستان و مێرگ شەوتین، جۆتکارێن هەرێمێ نکارن ڤەگەرن سەر کارێ خوە.
گوندێ چەلکێ یێ کانی ماسێ یا ناڤچەیا ئامێدی یا دهۆکێ یەک ژ وان گوندێن کو د ئەنجاما شەر و پەڤچوونێن ناڤبەرا هێزێن چەکدارێن ترکیێ و په‌كه‌كێ دە زیان دیتنە. د ڤان چەند سالێن داوی دە ژ بەر پرسگرێکێن ئەولەهیێ یێن ل هەرێمێ پرانیا شێنیێن گوند نەچار مان مالێن خوە بتەرکینن. تەڤی کو هنەک ژ شێنیێن گوند ئەڤ دەمەکە ڤەگەریانە مالێن خوە، لێ ژیانا وان هینا نەڤەگەریە رەوشا ئاسایی.
موختارێ گوندێ چەلکێ یوخەنا خۆشابا کو پرانیا شێنیێن وێ خرستیانن، گۆت: «ئەم دخوازن رەوشا ئەولەهیێ ل هەرێما مە نۆرمال ببە دا کو وەلاتیێن مە ڤەگەرن مالێن خوە. “ژ بەر ئالۆزیان ل گوندێ مە ب دەهان دۆنم ئەرد و دارستان شەوتین و هلوەشیان».
ژ بەر ناکۆکیێن سالێن داوی یێن د ناڤبەرا په‌كه‌كێ و ئارتێشا ترکیێ دە؛ 15 گوندێن گرێدایی ناڤچەیا کانی ماسێ هاتن ڤالاکرن، دەردۆر و جۆتکارێن 28 گوندێن دن یێن گرێدایی ناڤچەیا کانی ماسێ زیانەکە مەزن دیتن.
جۆتکارێ گوندێ چەلکێ مەهدی چەلکیی ژی دیار کر کو ژ بەر ئۆپەراسیۆنێن ئارتێشا ترک ب تایبەت ل سەر سینۆرێ گوندێ چەلکێ ئەڤ 2 سالن ئەو نکارن سوودێ ژ بەرهەمێن فێکیێن هەرێما خوە وەربگرن. دار هاتنه ژناڤبرن.
د شەر و پەڤچوونێن د ناڤبەرا هێزێن چەکدارێن ترکیێ و په‌كه‌كێ دە، د ناڤا 3 سالێن داوی دە ل باژارۆکێ کانی ماسێ زێدەتری 5 هەزار دۆنم دارستان و مێرگ شەوتین و جۆتکارێن وی گوندی ژی زێدەتری 5 ملیار دینار زیان دیتن.
رێڤەبەرێ قەزا کانی ماسێ سالح حەمدی راگهاند، د سێ سالێن بۆری دە زێدەتری 5 هەزار دۆنم دارستان ل وێ قەزایێ شەوتیە و رەوشا خرابا ئەولەهیێ ناهێلە هێزێن پاراستنا ژینگەهپارێزیا پێشمەرگە پرانیا ناڤچەیێ کۆنترۆل بکە.
